Яны будуць бліжэйшыя да рынкавых і прадугледжваюць «сумесныя меры эканамічнага характару», заявіў намесьнік міністра фінансаў РФ Дзьмітры Панкін.
У аўторак у інтэрвію агенцтву ПРАЙМ‑ТАСС намесьнік міністра паведаміў, што крэдыт выдзяляецца на 15 гадоў з 5‑гадовым ільготным пэрыядам па выплаце асноўнай пазыкі.
Пры гэтым Дзьмітры Панкін намякнуў, што крэдыт будзе зьвязаны з «плянам сумесных дзеяньняў, дзе будуць вызначаныя меры эканамічнага характару».Па яго словах, адначасова будуць «зафіксаваныя пытаньні валютнага курсу, доступу расейскіх кампаніяў на беларускі рынак прыватызацыі ў Беларусі, плацёжнага балянсу Беларусі». То бок, гаворка вядзецца пра праграму дзеяньняў у эканамічнай сфэры.
Варта адзначыць, што ў той жа дзень пра эканоміку казаў і галоўны рэдактар часопіса «Россия в глобальной политике» Фёдар Лук’янаў. У газэце «КоммерсантЪ» ён выказаў думку пра тое, што Расея магла б выкарыстаць цяперашні крызіс для якаснага ўмацаваньня сваіх пазіцыяў у рэгіёне.
«Умовай дапамогі суседзям павінна быць не вырашэньне каньюнктурных праблемаў, а фармаваньне доўгатэрміновых эканамічных сувязяў. Іншымі словамі, нельга набываць на крэдыты прызнаньне Абхазіі і Паўднёвай Асеціі», — мяркуе палітоляг.
Афіцыйная Масква ўдае спакойнае стаўленьне да адначасовага пошуку Менск альтэрнатыўных крыніцаў сродкаў, у прыватнасьці ў МВФ. Прынамсі намесьнік міністра фінансаў РФ ня ўбачыў у гэтым супярэчнасьцяў.
Разам з тым, той жа «КоммерсантЪ» нагадвае, што ў Масквы ёсьць «адпрацаваны спосаб зрабіць спадара Лукашэнку больш лагодным» і ў якасьці прыклада такога спосабу прыводзіць забарону Рассельгаснаглядам, накладзеную на ўвоз мясамалочнай прадукцыі некалькіх дзесяткаў беларускіх вытворцаў.