Брат Аляксандра Казуліна Ўладзімер правядзе 5 сутак у турме на Акрэсьціна. Адміністрацыйнае пакараньне ён атрымаў за спробу даведацца пра лёс свайго брата падчас падзеяў 2 сакавіка.
Судзілі Ўладзімера Казуліна завочна, яшчэ 17 сакавіка, у Маскоўскім судзе Менску. Прысуд вынесла судзьдзя Тамара Ўнукевіч.
Паводле жонкі Ўладзімера Казуліна Ірыны, яе муж ня ведаў, што суд адбудзецца, – гэтак жа нічога ня ведала і яна. Але жанчына згадала, што напярэдадні званіў участковы міліцыянт, пытаўся пра мужа, калі той прыедзе дамоў. Гэты ж участковы патэлефанаваў зноў 4 чэрвеня.
(Ірына Казуліна: ) «Потым у нядзелю ўвечары пазваніў участковы і сказаў, што трэба здавацца, бо будзе горш. І ўчора па яго прыехалі. Ён мне пасьпеў патэлефанаваць, сказаў, што павезьлі на Акрэсьціна».
Брата былога кандыдата на прэзыдэнта прызналі вінаватым у непадпарадкаваньні міліцыі падчас падзеяў 2 сакавіка каля Кастрычніцкага раённага ўпраўленьня міліцыі. Нагадаем, туды быў дастаўлены Аляксандар Казулін, якога затрымалі падчас спробы прайсьці на Ўсебеларускі народны сход. У міліцэйскім упраўленьні апазыцыйны кандыдат разьбіў партрэт Аляксандра Лукашэнкі. Пакуль палітыка трымалі, ягоныя сваякі й прыхільнікі сабраліся каля ўваходу ў будынак міліцыі. Пазьней частку гэтых людзей затрымалі супрацоўнікі «Алмазу» – нібыта каб спыніць штурм будынку.
Дачка Аляксандра Казуліна Юлія кажа, што ніякага штурму не было. Дзяўчына згадвае, як паводзіў сябе яе дзядзька падчас тых падзеяў:
(Юлія Казуліна: ) «Там такая мэталічная брама. Ён стаяў і трымаўся за гэтую браму й толькі аднаго разу пхнуў яе. А з другога боку стаялі міліцыянты. Калі гэта назваць штурмам, то я ня ведаю».
Паводле сваякоў Уладзімера Казуліна, пра прысуд ён даведаўся толькі ў траўні. Уладзімер Казулін спрабаваў абскардзіць прысуд у Менскім гарадзкім судзе, але там скаргу не задаволілі. Дарэчы, Уладзімер Казулін раней сам працаваў у міліцыі, у апараце Міністэрства ўнутраных справаў, адкуль звольніўся восем гадоў таму ў званьні маёра.
Сёньня адвакат Ігар Рынкевіч сустракаўся ў Жодзінскай турме з Аляксандрам Казуліным. Паводле адваката, палітык асудзіў арышт свайго брата, назваўшы гэта «помстай усім Казуліным з палітычных прычынаў».
5 чэрвеня на Кастрычніцкай плошчы разам з актывістамі моладзевага руху быў затрыманы сын Уладзімера Казуліна Аляксей. Пазьней Аляксей Казулін паведаміў сваякам, што падчас асабістага агляду міліцыянты нібыта спрабавалі падкінуць яму наркотыкі.
Сёньня ў прэсавай службе менскай міліцыі карэспандэнту «Свабода» заявілі, што сярод зарэгістраваных здарэньняў мінулага дня не зафіксаваны факт знойдзеных наркотыкаў у Аляксея Казуліна.
