«Нягледзячы на палітычную кан’юнктуру, можна сцвярджаць, што, атрымаўшы нялёгкую гістарычную спадчыну,
мы паспяхова будуем беларускую дзяржаву». Аб гэтым кіраўнік Адміністрацыі прэзідэнта Беларусі Уладзімір Макей заявіў сёння ў Мінску на міжнароднай навукова‑практычнай канферэнцыі «Беларусь: этапы станаўлення дзяржаўнасці». Упершыню за доўгі час чыноўнік такога рангу зрабіў выступ па-беларуску.
Ён адзначыў, што распад СССР паставіў перад беларускім народам некалькі гістарычных альтэрнатыў. Рэалізацыя некаторых з іх прывяла б да страты суверэнітэту і знікнення Беларусі з палітычнай карты свету.
«Смутнае для краіны ліхалецце завяршылася ў 1994 годзе з выбраннем першага прэзідэнта Беларусі Аляксандра Лукашэнкі»,— сказаў кіраўнік Адміністрацыі прэзідэнта.
Беларуская дзяржава ўзнікла выключна па волі народа, мяркуе кіраўнік Адміністрацыі.
«Беларуская дзяржаўнасць не была прынесена звонку. Полацкае і Тураўскае княствы, Кіеўская Русь і Вялікае княства Літоўскае — усё гэта вехі нашай гісторыі, этапы станаўлення беларускага этнасу», — сказаў ён.
Ён таксама падкрэсліў, што Беларусь яшчэ да вайны стала паўнацэннай еўрапейскай дзяржавай. «З 6 невялікіх паветаў Мінскай губерні ў 1921 годзе БССР да 1939 года ператварылася ў даволі моцную еўрапейскую дзяржаву з насельніцтвам больш як 10 млн. чалавек», — сказаў Уладзімір Макей. Беларусы працавалі ў тысячах эфектыўных сельгаспрадпрыемстваў, на высокатэхналагічных заводах, з’явілася Акадэмія навук, універістэт, ствараліся творы мастацтва.
