30 ліпеня – 13 жніўня 2006 г. у горадзе Сьветлагорску арганізуецца чарговая моладзевая археалягічная экспэдыцыя. Месца археалягічных раскопак – каля вёскі Адрубы Кабанаўскага сельсавету Жлобінскага раёну Гомельскай вобласьці.
Экспэдыцыю наладжвае Сьветлагорская раённая арганізацыя грамадзкага аб’яднаньня «Таварыства беларускай мовы імя Францыска Скарыны». Раскопкамі кіруе навуковы супрацоўнік Інстытуту гісторыі Нацыянальнай акадэміі навук Беларусі (г.Менск).
Ад’езд удзельнікаў са Сьветлагорску 30 ліпеня а 6-й гадзіне з чыгуначнай станцыі: 5 км на цягніку, затым – 15 км пешаходным спосабам. Цяжкі рыштунак адвозіцца са Сьветлагорску да месца раскопак на аўтамабілі. Вяртаньне ў Сьветлагорск 13 жніўня, для іншагародніх удзельнікаў магчымы ад’езд праз Жлобін.
Да ўдзелу ў экспэдыцыі запрашаюцца дзяўчаты і юнакі, якія цікавяцца гісторыяй, турысцкімі вандроўкамі – навучэнцы 9–11 клясаў, студэнты, моладзь. Удзел у экспэдыцыі – добраахвотны і неаплатны. Валянтэры працуюць па 4 гадзіны ў дзень на раскопках старажытнага гарадзішча, астатні час прысьвячаецца адпачынку.
Экспэдыцыя праводзіцца ў маляўнічым месцы на беразе ракі Бярэзіна. Валянтэры самастойна ўсталёўваюць намётавы летнік; харчаваньне гатуюць на вогнішчы. Усе пытаньні ў летніку вырашаюцца на прынцыпах самакіраваньня. Удзельнікі мусяць не баяцца складанасьцяў, мець моцны характар і заўсёды быць гатовымі прыйсьці на дапамогу сябрам. Вынікі раскопак будуць матэрыялам для навукі. Актыўныя ўдзельнікі заахвочваюцца пісьмовымі падзякамі Інстытуту гісторыі Нацыянальнай акадэміі навук Беларусі.
Валянтэры павінны мець уласны рыштунак (намёт і іншае). Сьветлагорская арганізацыя ТБМ і Інстытут гісторыі забясьпечваюць харчаваньне ў экспэдыцыі, праезд ад Сьветлагорску да месца раскопак і ў зваротным кірунку.
Усе, хто зацікавіўся, могуць атрымаць дадатковую інфармацыю (сьпіс неабходнага рыштунку, зьвесткі аб археалягічных дасьледаваньнях на гарадзішчы Адрубы, фатаздымкі з экспэдыцыяў папярэдніх гадоў і гэтак далей):
паштовы адрас – аддзяленьне сувязі №2, паштовая скрыня 32, 247402, г.Сьветлагорск, Гомельская вобл., Беларусь;
тэлефоны – (+375) (0) (2342) 4-25-50, (0)(29) 709-04-33 – Андрэй Музычэнка, (0)(2342) 4-69-33 – Марыяна Мірчук, 4-76-13 – факс;
Аб жаданьні ўзяць удзел у экспэдыцыі просьба паведаміць да 15 ліпеня.
Экспэдыцыя – гэта незабыўныя ўражаньні і добры летні адпачынак!
