Швэдзкае інтэлектуальнае кіно зь беларускімі субтытрамі.
Рэспубліканскі палац культуры вэтэранаў (Янкі Купалы, 21). Пачатак а 19-й гадзіне. Уваход вольны.
«Нож у сэрца» – гэта сучасная музычная драма пра каханьне, сяброўства і вялікія мары. Галоўныя героі фільму – дзевяць маладых людзей, якія знаходзяцца на шляху ў дарослае жыцьцё. Яны паходзяць з розных краінаў сьвету і маюць за плячыма розныя гісторыі і жыцьцёвы досьвед. Тое, што іх аб’ядноўвае, – гэта ўмовы жыцьця ў прыгарадзе. Пасярод бэтону Бэргшану, гарадзкога раёну на ўскрайку Гётэборгу, разыгрываецца драма любоўнага трохкутніка паміж мараканцам Амірам, яго лепшым сябрам Хуанам з Чылі і прыгажуняй з Курдыстану Сабінай. Амір і Хуан пакляліся ў вернасьці адзін аднаму і песьцяць аднолькавую надзею: дабіцца павагі і значнага палажэньня ў тым сьвеце, які ім вядомы. У сьвеце, што нясе на сабе адбітак гвалту і злачыннасьці, але адначасова з тым – радасьці і братэрства.
Ролі выконваюць звычайныя гарадзкія падлеткі. Падчас здымак фільму акторы-аматары прайшлі інтэнсіўныя курсы акторскага майстэрства, танцаў і сьпеваў.
Музыка мае тут вялікую ролю. Акторы танчаць і сьпяваюць самі пад мэлёдыі, напісаныя цікавымі швэдзкімі кампазытарамі-песеньнікамі.
«Нож у сэрца» – рэжысэрская праца Агнеты Фагерстрам-Ульсан, якая таксама выступае суаўтаркай сцэнара разам з Пэтэрам Біру. Гэта трэцяя і заключная частка іх трылёгіі пра Новую Эўропу, праекту, над якім гэты творчы дуэт працаваў восем гадоў.
У 2005 годзе на старэйшым і самым прэстыжным у сьвеце тэлевізійным конкурсе Prix Italia журы адзінадушна прызнала «Нож у сэрца» лепшым шматсэрыйным фільмам. Карціну назвалі «моцнай прачулай і неверагодна захапляльнай».
Квіткі можна атрымаць у Рэспубліканскім палацы культуры вэтэранаў (Янкі Купалы, 21), а таксама ў аддзяленьні пасольства Швэцыі (Музычны завулак, 1/2).
Фільм дэманструецца на мове арыгіналу зь беларускімі субтытрамі.
