заснавальнікі парталу Сяргей Будкін і Вецер Механічны
«Тузіну Гітоў» — 5 год.
Вы заходзіце на адрас music.fromby.net і пампуеце сабе на кампутар апошнія песні айчынных выканаўцаў. Акрамя гэтага на сеціўнай старонцы можна прачытаць апошнія музычныя навіны і даслаць у хіт‑парад свой голас за ўлюбёную песню.
«Тузін Гітоў» здзейсніў у айчыннай інтэрнэт‑прасторы як не рэвалюцыю, дык пераварот.Пасля з’яўлення парталу беларуская песня зрабілася мабільнай: напрыклад, цяпер яе, націснуўшы разоў колькі па клавіятуры, можна пачуць за межамі Беларусі.
Па‑другое, партал стварыў віртуальную пляцоўку, дзе сустракаюцца музыкі, іх слухачы, а таксама музычныя прадусары. У краіне, дзе шоў‑бізнэс гібее, а прасоўванне рок‑музыкі дык увогуле трымаецца на плячах саміх выканаўцаў, паўстаў сайт, які стварае патрэбны для кожнага творцы розгалас.
Адзін з стваральнікаў парталу, журналіст Сяргей Будкін са здзейсненага найбольш ганарыцца лічбамі: «Уявіце, за пяць гадоў у Сеціве нас наведала больш за мільён чалавек! 50 тысяч спампоўванняў беларускіх песняў штомесяц». А калі да гэтых лічбаў дадаць 150 вялікіх рэцэнзіяў на музычныя навінкі, дык атрымаецца змястоўны жыццяпіс сучаснай айчыннай альтэрнатыўнай музыкі.
Праект «Тузін Гітоў» — некамерцыйны.
Гаспадар сайту, можа быць, сама загадкавая постаць беларускай музычнай тусоўкі, Вецер Механічны (чалавек, які нават сваім калегам па сайце не раскрывае сапраўднага імя)лічыць, што мэта «Тузіна Гітоў» — не пераход на эканамічныя рэйкі, а пашырэнне магчымасцяў сайту.
Ён кажа: «Нам даспадобы працаваць у нашым фармаце. З аднаго боку гэта непрыбыткова, але, з іншага боку, такая некамерцыйнасць шмат у чым развязвае рукі, робіць вальнейшымі, і дазваляе нам даносіць да наведвальнікаў свае ідэі, беспасярэдне ствараць музычны кантэкст. У будучым жа мы плануем зрабіць сайт яшчэ больш інтэрактыўным, даць нашым наведвальнікам магчымасць пісаць свае навіны, а таксама ўсталюем секцыю відэа».
Калі напачатку шляху партал «Тузін гітоў» толькі адлюстроўваў падзеі ў беларускай музыцы і музычным асяродку, дык цяпер сам часцяком з’яўляецца ньюсмэйкерам. Вось напрыклад гэтымі днямі, сайт не проста святкуе пяцігоддзе, але
і выдаў да нагоды песенную справаздачу, мультымедыйны дыск «Прэм’ер Тузін‑2008», куды ўвайшлі найлепшых 12 песняў,вызначаных галасаваннем слухачоў сайту. Тут будуць і вядомыя гурты: J:Mopc, Neura Dubel, IQ48, а таксама новыя імёны: спявачка Тацяна Беланогая, групы Jab Club I ILO&friends.
Дарэчы, паводле стваральнікаў сайту, самай «пачутай» песняй за ўсю гісторыю парталу была песня гурту Н.Р.М. — «Гадзючнік». Яе паслухалі (ці прынамсі спампавалі) блізу 100 тысячаў чалавек, то бок кожны соты беларус.
