- Гэткім шчырым каханнем яе атуліў,
Гэткай ласкай глядзеў ў яе сумныя вочы, -
Як і сонца не туліць расквечаных ніў,
Як і зоры людзям не ўглядаюцца ўночы!
Янка Купала
Каханне… здавалася б, звычайнае слова… Але менавіта гэтае пачуццё напаўняе сэнсам наша жыццё, робіць нас моцнымі і рашучымі…
Я кахаю цябе… Дзеля гэтых трох слоў чалавек і жыве на зямлі…
Набліжаецца самае прыгожае для ўсіх закаханых свята – Дзень Святога Валянціна.
Дзяржаўны літаратурны музей Янкі Купалы, паэта, тэма кахання ў творчасці якога займае значнае месца, рыхтуецца да гэтай падзеі.
13, 14, 15 лютага ў музеі праводзяцца экскурсіі для закаханых.Ён і Яна адчуюць лёгкі дотык Купалавай паэзіі, што гімнам гучыць у гонар гэтага святога пачуцця. Будуць чытацца вершы паэта пра Каханне, а мужчыны у Доме Купалы змогуць вершаванымі радкамі паэта яшчэ раз прызнацца ў каханні Той Адзінай, або самі напісаць некалькі прыгожых слоў.
13 лютага ў 17.00 адбудзецца вечарына для закаханых. Выканаўца – выдатны беларускі кампазітар, бард Алесь Камоцкі, разам з голасам якога адразу трапляеш у палон Пані Мелодыі, забываеш пра будзённую мітусню… Будуць гучаць аўтарскія песні, песні на словы Максіма Багдановіча, Уладзіміра Караткевіча, галоўная тэма якіх – Каханне… У кожнага наведвальніка з'явіцца ўнікальная магчымасць на некаторы час перанесціся ў краіну мараў, на востраў Любові…
***
13, 14, 15 лютага дзверы музея цэлы дзень будуць адчынены для ўсіх закаханых! Кахайце, кахайце кожны дзень, кожную хвілінку, кожнае імгненне…
Прыходзьце ў Дзяржаўны літаратурны музей Янкі Купалы, і ў Вас, і Вашага любімага чалавека на некаторы час ў рытме Любові заб'ецца сэрца…
Даведкі па тэл. 227-78-66
