Валянцін Сукала, фота Юліі Дарашкевіч
Старшыня Вярхоўнага суду Валянцін Сукала паведаміў на прэс‑канферэнцыі ў сераду, што ў адпаведнасці з новымі прапановамі, якія ўносяцца ў крымінальна‑працэсуальнае заканадаўства,
сума «ўгоды з правасуддзем» будзе складаць ад 300 да 5000 базавых велічынь. То бок, не больш за 60 тысяч даляраў.
Новаўвядзенне заключаецца ў тым, што чалавек, які раскайваецца ва ўчыненым злачынстве, зможа звярнуцца ў суд з просьбай дазволіць яму ажыццявіць «сацыяльную кампенсацыю» за свае супрацьпраўныя дзеянні.Цану будзе называць дзяржабвінаваўца. У спіс, дзе будзе прымяняцца «угода з правасуддзем» трапяць 28 відаў негвалтоўных злачынстваў, але не ўваходзяць карупцыйныя. На думку Сукалы, гэта не дасць нагоды для здзяйснення эканамічных злачынстваў.
Валянцін Сукала адзначыў, што пакуль тэрмін «угода з правасуддзем» не вельмі звыклая для беларускага вуха, але шырока ўжываецца ў краінах захаду.
«Пасля залічэння абвінавачаным на дэпазіт сумы у судовым паседжанні абвяшчаецца перапынак на 15 дзён, пасля чаго суд прымае рашэнне, ці прымаць ва ўвагу сацыяльную кампенсацыю», — сказаў В.Сукала.
Летась узраслі агульныя аб’ёмы правасуддзя. Знізілася толькі колькасць крымінальных судоў на 4%. Затое ўзраслі грамадзянскіх на 10% і адміністрацыйных — на 28%.
У сярэднім на аднаго суддзю ў месяц летась прыходзілася 85,5 справаў.
22% ад агульнай колькасці прысудаў скончыліся пазбаўленнем волі.
