Узроставае абмежаванне на продаж спіртных напіткаў у Беларусі плануецца павялічыць да 21 года. Такое палажэнне змяшчаецца ў законапраекце «Аб асновах дзяржаўнай маладзёжнай палітыкі»,які будзе разгледжаны палатай прадстаўнікоў на маючай адбыцца вясенняй сесіі. Аб гэтым карэспандэнту БЕЛТА паведаміла член пастаяннай камісіі палаты прадстаўнікоў па ахове здароўя, фізічнай культуры, справах сям’і і моладзі Алена Шамаль.
Паводле яе слоў, упершыню законапраектам прапануецца павялічыць узроставае абмежаванне на продаж спіртных напіткаў у Беларусі з 18 гадоў да 21 года. Гэта пытанне не раз узнімалася як парламентарыямі, так і прадстаўнікамі праваахоўных органаў Беларусі, работнікамі медыцыны і адукацыі. Як лічыць парламентарый,
гэта пытанне неабходна абмяркоўваць у рамках не толькі закона аб дзяржаўнай палітыцы адносна моладзі, але і іншых заканадаўчых актаў.
Алена Шамаль таксама расказала, што законапраектам прапануецца дакладна вызначыць паняцце катэгорыі «маладыя грамадзяне». Гэта будуць грамадзяне Беларусі, замежныя грамадзяне і асобы без грамадзянства, якія пастаянна пражываюць на тэрыторыі Беларусі ва ўзросце ад 14 да 31 года. Паводле яе слоў, на сённяшні дзень гэта пытанне яшчэ канчаткова не вырашана і знаходзіцца на стадыі абмеркавання, таму што вельмі вялікая ўзроставая разбежка, і ў яе ўключаны розныя катэгорыі моладзі. У прыватнасці, адна з прапаноў — раздзяленне катэгорыі маладых грамадзян на некалькі груп.
Да гэтага законапраекта не варта ставіцца так, як быццам гэта будзе закон спецыфікаваных ільгот для моладзі, падкрэсліла Алена Шамаль. «Гэта няправільна: моладзь сама павінна актыўна ўдзельнічаць у палітычным і сацыяльным жыцці краіны, а не расці як утрыманцы. Сёння моладзь працуе на самых адказных складаных участках, сучасным тэхнічным абсталяванні», — сказала яна.
Парламентарый таксама дадала, што законапраект распрацоўваецца ў якасці базавага закона, на аснове якога, пасля яго прыняцця, будуць будавацца іншыя заканадаўчыя акты.
