Прэм’ер‑міністр Расійскай Федэрацыі Уладзімір Пуцін падпісаў пастанову аб выдзяленні Беларусі крэдыту ў 500 млн. даляраў. Пра гэта было заяўлена 5 сакавіка на пасяджэнні прэзідыума ўрада Расіі.
«Паводле просьбы беларускага боку мы прынялі рашэнне, і сёння я падпісаў адпаведную пастанову ўрада. Мы выдзяляем Беларусі яшчэ адзін крэдыт — паўмільярда даляраў. Прашу Міністэрства фінансаў аператыўна выканаць гэтае рашэнне», — цытуе У.Пуціна РІА Новости.
Кіраўнік расійскага ўрада нагадаў, што ў канцы 2007 года Расія выдзеліла льготны крэдыт Беларусі ў 1,5 млрд. даляраў, а ў 2008 годзе — каля 1 млрд. даляраў. Апрача таго, «за гэты ж час «Газпром» праплаціў за 50% «Белтрансгаза» больш як 1 мільярд 200 мільёнаў даляраў».
У.Пуцін адзначыў канструктыўнае супрацоўніцтва Беларусі і Расіі, заўважыўшы, што абедзве краіны ўпэўнена рухаюцца «ў напрамку да стварэння саюзнай дзяржавы».
Як паведамлялася раней, 3 сакавіка віцэ‑прэм’ер — міністр фінансаў Расіі Аляксей Кудрын паведаміў, што міжурадавае пагадненне аб выдзяленні Беларусі крэдыту ў 500 млн. даляраў будзе падпісана найбліжэйшымі днямі. Пазней, пасля ўнясення паправак у бюджэт на 2009 год, будзе падпісана яшчэ адно пагадненне аб выдзяленні 500 млн. даляраў.
Першая частка расійскага крэдыту ў памеры 1 млрд. даляраў паступіла на рахунак Мінфіна Беларусі 18 лістапада 2008 года. Дзяржаўны крэдыт выдзелены Беларусі на 15 гадоў па стаўцы Libor плюс 3% гадавых з адтэрміноўкай пагашэння асноўнага доўгу на пяць гадоў.
Планавалася, што другі транш у памеры 1 млрд. даляраў будзе пералічаны Беларусі да канца лютага 2009 года пасля падпісання праграмы сумесных дзеянняў па развіцці эканамічнага супрацоўніцтва. У канцы студзеня Уладзімір Пуцін абяцаў паскорыць выдачу другой часткі крэдыту.
Прэм’ер‑міністр Беларусі Сяргей Сідорскі падчас візіту ў Санкт‑Пецярбург 27 лютага заявіў, што Мінфін Расіі звярнуўся да беларускіх партнёраў з просьбай падзяліць сродкі другой часткі крэдыту яшчэ на два траншы — па 500 млн. даляраў у лютым і сакавіку.
Вядома таксама, што апрача стабілізацыйнага крэдыту беларускія ўлады запыталі ў Расіі крэдыт у 100 млрд. расійскіх рублёў у абмен на пераход на разлікі ў рублях ва ўзаемным гандлі. Рашэнне па гэтым запыце пакуль не прынята.
Паводле звестак Мінфіна Беларусі, знешні дзяржаўны доўг у 2008 годзе ўзрос на 1 млрд. 382,2 млн. даляраў (на 59,2%) і на 1 студзеня 2009 года склаў 3 млрд. 718,9 млн. даляраў ЗША.
