Супрацоўнікі міліцыі Астраўца (Гродзенская вобласць) правялі дагляд у доме лідэра грамадскай ініцыятывы «Астравецкая атамная — гэта злачынства» Мікалая Уласевіча. Пра гэта ён паведаміў БелаПАН.
Паводле слоў М.Уласевіча, супрацоўнікі міліцыі правялі дагляд памяшканняў у яго прыватным доме раніцай 11 сакавіка. «Міліцыянеры кіраваліся ордэрам, выдадзеным пракурорам Астравецкага раёна яшчэ 6 сакавіка. Аднак у гэты час я быў у Мінску на форуме няўрадавых арганізацый, таму 6—7 сакавіка яны не змаглі правесці агляд», — сказаў М.Уласевіч.
Як паведаміў актывіст, ніякай канфіскацыі матэрыялаў у яго не праводзілася. «Супрацоўнікі міліцыі з панятымі проста агледзелі мой дом, зрабілі фатаграфіі камп’ютэра і аргтэхнікі і пайшлі. Згодна з ордэрам, агляд памяшкання звязаны з выданнем газеты «Островецкий вестник». Аднак асобнікаў гэтай газеты ў мяне няма, і браць у мяне няма чаго», — сказаў М.Уласевіч.
Нагадаем, першы нумар газеты «Островецкий вестник» выйшаў у лютым гэтага года. Яна не зарэгістравана і выйшла накладам не больш як 299 асобнікаў, што, згодна з заканадаўствам, магчыма без афіцыйнай рэгістрацыі. У першым нумары былі змешчаныя матэрыялы, аўтары якіх выступаюць супраць будаўніцтва беларускай АЭС у Астравецкім раёне.
М.Уласевіч паведаміў, што ён абскардзіў пастанову на правядзенне дагляду ў пракуратуры Астравецкага раёна, а таксама накіраваў скаргу генеральнаму пракурору Беларусі з патрабаваннем адмяніць гэтую пастанову.
Як раней паведамляў БелаПАН, у пачатку лістапада 2008 года сем жыхароў Астравецкага раёна, дзе плануецца будаўніцтва АЭС, сфарміравалі аргкамітэт па стварэнні грамадскай ініцыятывы «Астравецкая атамная — гэта злачынства». Члены аргкамітэта лічаць, што АЭС «па вызначэнні не можа быць пабудаваная ў самай сейсманебяспечнай зоне, якой з’яўляецца Астравецкі раён Гродзенскай вобласці». Апрача таго, яны «ўпэўненыя, што будаўніцтва АЭС у постчарнобыльскай Беларусі — гэта не проста памылка, а злачынная задума, якая непазбежна прывядзе да яшчэ адной вялікай і непапраўнай бяды, якая выйдзе далёка за межы нацыянальных маштабаў».
