Часам здзіўляе жаданне калегаў звязаць падзеі, якія з сабой абсалютна не звязаныя.
Апошні прыклад — звальненне Марыюша Машкевіча і звальненне Агнешкі Рамашэўскай. Найбольш адчайныя нават сцвярджаюць, што гэта адбылося ў адзін дзень. На самой справе пра тое, што Машкевіч не адказвае ўжо за «беларускае пытанне» у польскім МЗС я даведаўся яшчэ на мінулым тыдні калі быць дакладным дык у пятніцу. Не выключана, што звальненне адбылося яшчэ раней...
Але нават не гэта галоўнае.
Падыходы Рамашэўскай і Машкевіча да cітуацыі на Беларусі былі абсалютна супрацьлеглыя.
Машкевіч быў гарачым прыхільнікам лагоднай палітыкі ў дачыненні да Лукашэнкі і ёй спрыяў. Агнешка Рамашэўская больш рэалістычна ацэньвала прычыны «беларускай лібералізацыі» і адпаведна зусім інакш глядзела на яе перспектывы.
Рашэнне пра звальненне Машкевіча прымаў МЗС, рашэнне пра звальненне Рамашэўскай шэф TVP. Прычым звальненне Рамашэўскай адбылося без кансультацый з польскім урадам (падцверджанне таму публічны дэмарш «wszystkich świętych» на чале з маршалкам Сэната Богданам Барусэвічам).
Але такое ўражанне, што гэтыя падрабязнасці цяпер мала кога не цікавяць.
З свайго боку спадзяюся, што Агнешка Рамашэўская яшчэ вернецца на «Белсат» таму што цяжка ўявіць гэты праект без яе...
