Глен Хэнлан, які ўзначальвае нацыянальную зборную Беларусі па хакеі, падпісаў кантракт з мінскім «Дынама», што выступае ў Кантынентальнай хакейнай лізе.
З новага сезона канадскі спецыяліст будзе сумяшчаць працу ў клубе і зборнай. На пасадзе галоўнага трэнера «Дынама» ён змяніў расійскага спецыяліста Васіля Спірыдонава.
«Кантракт пачне дзейнічаць у ліпені», — паведаміў Г.Хэнлан на прэс‑канферэнцыі ў Мінску 25 сакавіка. Назваць тэрмін дзеяння дагавора ён адмовіўся. Трэнер прыбыў у Мінск адразу пасля таго, як яго ранейшы клуб «Йокерыт» выбыў з плэй‑оф чэмпіянату Фінляндыі.
«Я ўдзячны ўсім, што атрымаў магчымасць вярнуцца дамоў. Для мяне гэта унікальны шанс і вялікая радасць. Я прыехаў не як паўночнаамерыканскі спецыяліст, а як беларускі трэнер. За сваю кар’еру я столькі працаваў з беларускай зборнай, што лічу гэтую краіну сваёй другой радзімай», — зазначыў Г.Хэнлан.
Паводле яго слоў, у дынамаўцаў будзе вельмі важны сезон у КХЛ, паколькі наперадзе зімовыя Алімпійскія гульні 2010 года. «Асноўная задача — прыцягваць як мага больш беларускіх хакеістаў, развіваць не толькі «Дынама», але і ўвесь беларускі хакей», — падкрэсліў трэнер.
У той жа час, паводле яго слоў, каманда не зможа абысціся без вопытных легіянераў, калі хоча змагацца за месца ў плэй‑оф. «Мы не будзем размяжоўваць гульцоў па нацыянальнай прыкмеце. Гэта адна вялікая сям’я», — заявіў трэнер. Г.Хэнлан лічыць, што легіянеры павінны жыць з сем’ямі на кватэрах. «Я і намеснік генеральнага дырэктара клуба Шон Сімпсан лічым Мінск лепшым горадам у КХЛ», — сказаў Г.Хэнлан.
Як паведаміў старшыня Федэрацыі хакея Беларусі Уладзімір Навумаў, у новым сезоне перад камандай стаіць задача заняць месца не ніжэй за дзесятаеі прайсці «не менш за два раунды плэй‑оф». «Для выканання гэтай задачы ў нас ёсць мацнейшы спартыўны дух», — заявіў У.Навумаў.
Паводле яго слоў, кандыдатура Г.Хэнлана была адзінай, якую разглядала федэрацыя. «Былі прапановы ад іншых трэнераў. Яны прымаліся, але не разглядаліся», — сказаў У.Навумаў.
Склад «Дынама» павінен быць укамплектаваны да 1 ліпеня. У.Навумаў разлічвае, што капітанам каманды ў новым сезоне будзе Канстанцін Кальцоў. «У яго дзейны кантракт з клубам «Салават Юлаеў», але гэта ўжо наша праблема, як зрабіць яго гульцом «Дынама», — сказаў старшыня ФХРБ.
У.Навумаў паведаміў, што Г.Хэнлан перавязе ў Мінск жонку і сына. Жонка будзе працаваць настаўніцай.
***
Дарэчы, перад зборнай Беларусі пастаўлена задача на чэмпіянаце свету па хакеі, што пройдзе ў Швейцарыі з 24 красавіка на 10 траўня, не ніжэй за сёмае.Нашымі супернікамі па групе «А» будуць зборныя: Славакіі, Канады і Венгрыі.
Тры лепшыя каманды групы «А» выходзяць у наступны раўнд, дзе іх супернікамі будуць тры лепшыя каманды групы «D» (Фінляндыя, Чэхія, Нарвегія, Данія).
