У Астраўцы, як вядома, пабудуюць атамную электрастанцыю. З гэтай нагоды, разам з усім паспалітым людам цешыцца-трыумфуе і Беларуская Партыя Зялёных. Яны амаль непадпольна нават выдалі газетку «Мірны атам», у якой ясна адчуваецца почырк легендарных «Навінак».
У нумары:
Пра мутанта, бенгальскага зубра-беляка, чыя полавыя спеласць наступае праз 10 хвілін, а саміца якога здольная адкладваць да 30 яек.
Конкурс на найлепшы здымак атамнага «грыба» на мабільнік (першы прыз —«рэальна абабітая кутасікамі фанерная труна»).
Рэпартаж з Горацкага раёну, з мясцовасці, дзе колісь меркавалася пабудаваць атамную электрастанцыю. Паводле газеты «Мірны Атам», у Горацкім раёне з тае прычыны назіраецца выбух дэпрэсіўных і суіцыдальных настрояў.
А яшчэ мірнаатамаўцы аргументавана прагназуюць пераўтварэнне Астраўца ў адзін з цэнтраў планеты (а-ля Новыя Васюкі). І калі гэта ўпраўду адбудзецца, і ў Астраўцы нават правядуць метро, дык дзякуючы газеце «Мірны атам» у новых станцыяў ужо будуць гатовыя назвы для станцыяў. Такім чынам, увазе чытача прапануецца схема будучага астравецкага метрапалітэна, дзе ёсць станцыі «імя 300-годдзя паўраспаду» і «Шчытавідная» (з выхадам да пітомніка мутантаў).
