Знаўцы старажытнага інструмента і аматары традыцыйнага фолку збяруцца сёлета на штогадовым міжнародным «Дударскім фэсце».
Адкрыццё фестывалю адбудзецца ў сталічным клубе «Рэактар» 24 красавіка, а заключны канцэрт пройдзе 28 красавіка ды ўпершыню пад адкрытым небам.
Прадзюсар фестывалю Зміцер Сасноўскі кажа, што з’явіўся гурт Litvintroll, які прынцыпова выкарыстоўвае беларускія народныя дуды і спалучае іх з рокам.
«На канцэрце фэсту ім будзе аддадзеная цэлая гадзіна, каб гурт меў магчымасць пазнаёміць слухачоў са сваім новым альбомам».
Другое адрозненне фестывалю ў тым, што ў праграме з’явіўся папулярны і нават папсовы гурт, як сцвярджаюць самі музыкі. Гурт «ESPRIT» разам з дударом Алесем Чумаковым выканае тры кампазіцыі, дзве з іх з шатландскай дудой, адну — з беларускай.
Кожны год на фестываль прыязджае новы замежны калектыў. Сёлета завітае гурт «Kapela ziele» з Познані, а ў заключны дзень разам з гуртом «Келіх Кола» зайграе джэм‑сэйшн музыка Рунэ з дацкага сярэдневечнага гурта «GNY».
Асноўнай разынкай для аматараў сярэднявечча і беларускай традыцыі будзе апошні дзень, 28 красавіка
Упершыню ў гісторыі «Дударскага фэсту» адбудзецца канцэрт на адкрытай пляцоўцы —.
Пройдзе ён з 13.00 да 19.00 у фальварку «Дудуткі».
«Мы запрасілі рамеснікаў, будзе працаваць нацыянальная кухня, можна будзе пакаштаваць нацыянальныя напоі. Турыстычныя фірмы абяцалі прывезці на фестываль турыстаў», — распавядаюць арганізатары.
На думку Змітра Сасноўскага, канцэрт пад адкрытым небам — унікальная магчымасць паслухаць, як гучаць і як сябе паводзяць беларускія дуды на адкрытым паветры. «Напрыклад, — кажа музыка, — на дударскіх фэстах у Англіі і Шатландыі ёсць нават выпрабаванне — тры гадзіны дудар мусіць граць на адкрытым паветры, каб паказаць, што яго дуда — прафесійная».
Трэці год запар у межах «Дударскага фэсту» адбудзецца навуковая канферэнцыя. Па традыцыі месцам сустрэчы дудароў стане хутар старэйшага майстра Алеся Лася.
Сярод удзельнікаў сёлетняга «Дударскага фэсту»: «Стары Ольса», «Testamentum terrae», «Расалія», «Ceilidh Ceol», «ESPRIT», «Келіх кола», Тодар Кашкурэвіч, Дзяніс Сухі і гурт «Дзевясіл», «Kapela ziele» (Польшча), гурт «Гістрыён».