У межах праекту «Тузін. Перазагрузка» інтэрнэт‑парталу «Тузін Гітоў» і грамадзкай кампаніі «Будзьма беларусамі» бярэ ўдзел гурт «Стокс».
Яны перасьпяваюць па‑беларуску адзін з сваіх галоўных гітоў «Под куполом небес».
 |
Музыкі, якія цяпер жывуць у Маскве, кажуць: «Калі наша песьня будзе цікавай пэўнай праслойцы грамадзтва ў такім варыянце, то чаму і не. Беларуская мова існуе і мы адчуваем сябе беларусамі».
Гурт «Стокс» існуе ўжо 13 гадоў і ўвесь час пераязджае з гораду ў горад. Утварылася каманда ў Наваполацку, потым пераехала ў Менск, дэбютны альбом выдала ў Нямеччыне, цяперака поўным складам жыве і працуе ў Расеі.
У першы год свайго існаваньня тады яшчэ ангельскамоўныя «стоксы» атрымалі добры аванс — прыз за «Найлепшы дэбют году» на «Рок‑Каранацыі‑96». Іх дэбютны альбом No Escape (1999) падмацаваў посьпех. Дыск быў спрадусаваны гітарыстам Віктарам Смольскім з гурта Rage і выйшаў у Нямеччыне.
Потым гурт вырашыў засьпяваць па‑расейску і запісаў песьню, якая напраўду гучала пэўны час з кожнага праса — «Между Минском и Римом».
У 2006 годзе яны ўзялі гран‑пры на расейскім конкурсе «Рок‑дом» і падпісалі кантракт з Аляксандрам Куцікавым, музыкам гурта «Машина времени», кіраўніком лэйблу Sintez Records, які стаў прадусарам беларускай каманды. Музыкі актыўна ўвайшлі ў расейскую музычную прастору, гралі на «Musicfest 2006» у Лужніках, фэсьце «Движение» ў Самары ды іншых буйных оўпэн‑эйрах. Разам зь «Ляпісам Трубяцкім» і «Бі‑2» былі хэдлайнэрамі беларускага фэсту «Рок за Баброў».
Летась «Стокс» запісалі свой другі нумарны альбом «Не замерзай», які трапіў у топ‑10 рэлізаў году па вэрсіі Experty.by, а цяпер працуюць над новай праграмай. У межах праекту «Перазагрузка» музыкі перасьпяваюць адзін са сваіх галоўных гітоў «Под куполом небес».
Музыкі прызнаюцца, што заўжды станоўча ставіліся да беларускай мовы, клявішнік каманды Кірыл Парфёнаў колісь уваходзіў у склад легенды беларускага року — гурта «Мясцовы час», але ўласна «Стокс» толькі аднойчы сьпявалі па‑беларуску — у праекце «Песьнярок» (1997) яны выконвалі песьню «Ружы цьвет».
«Калі нашая песьня будзе цікавая пэўнай праслойцы грамадзтва ў такім варыянце, то чаму і не. Беларуская мова існуе і мы адчуваем сябе беларусамі», — кажа Аляксей Стокс, які цяпер жыве паміж Масквой і Наваполацкам, дзе дагэтуль знаходзіцца яго сям’я. За пераасэнсаваньне песьні «Под куполом небес» узяўся паэт Глеб Лабадзенка.
Наступны ўдзельнік праекту «Перазагрузка» будзе прадстаўлены 7 траўня.
