Расійскі інтэрнет‑праект Спорт‑Сегодня, у якім задзейнічаныя і беларускія журналісты, прааналізаваў гульню футбалістаў «Барселоны», якая ў мінулую суботу стала 19‑разовым чэмпіёнам Іспаніі.
Кожны з 19 гульцоў, якія больш-менш рэгулярна выходзілі на поле, атрымаў адзнаку паводле дзесяцібальнай шкалы. а таксама кароткае рэзюмэ.
Найлепшымі гульцамі сезона 2008/2009 прызнаныя: Хаві і Андрэс Ін’еста, што атрымалі па 8,5 балаў.
Ц’еры Анры атрымаў восем балаў, Самюэль Это’о і Ліянель Мессі па 7,5 балаў.
Паўабаронца «Барсы» і зборнай Беларусі Аляксандр Глеб толькі 4,5 бала. Гэта самая нізкая адзнака. Столькі атрымаў толькі Эйдур Гуд’ёнсан.
У Сілвіньё - 5,5 балаў, у Марціна Касэрэса, Бояна Кркіча, Эрыка Абідаля — 6, у капітана каманды Карлеса Пуёля, Яя Турэ — 6,5, галкіпера Віктара Вальдэса, а таксама Рафаэля Маркеса, Сэржы Бускетса, Сейду Кейта — 7, у Херарда Піке — 7,5, у Даніэла Алвэша — 8.
Па-за спісам 19-ці засталіся паўабаронца Віктар Санчэс і форвард Педра Радрыгес Ледэсма (г.зв. Педрыта).
Пра Глеба «Спорт‑Сегодня» піша:
«Самы дзіўны набытак клуба. Сваю лепшую гульню Аляксандр паказаў у першым тайме нічыйнага матчу з «Расінгам» [13 верасня], у якім атрымаў траўму і быў заменены.
Пазней ужо не было гульцоў, якіх варта было памяняць на Глеба.
Адно з асноўных пытанняў таксама ў тым, чаму яго ніводнага разу не паставілі гуляць у цэнтр паўабароны».
Аляксандр Глеб у матчах чэмпіянату Іспаніі правёў 17 матчаў з 36 (учора ўвесь матч супраць «Мальёркі), прычым толькі ў шасці выйшаў у стартавым складзе, не забіў ніводнага мяча, як і ў матчах на Кубак і Лізе чэмпіёнаў.
Не факт, што ён згуляе ў фінале Лігі чэмпіёнаў супраць «МанЮнайтэд». Учора Хасэп Гвардыёла даў адпачыць гульцам асноўнага складу, каб тыя лепей рыхтаваліся да матчу 27 траўня. Глеб, наадварот, выйшаў у стартавым складзе.