Судовая калегія па крымінальных справах Вярхоўнага суда Беларусі пакінула ў сіле прысуд Гомельскага абласнога суда ў дачыненні да жыхароў вёскі Пухавічы Жыткавіцкага раёна Гомельскай вобласці Сяргея Аліферовіча і Ігара Макарэвіча. Іх касацыйная скарга па выніках разгляду 9 чэрвеня пакінута без задавальнення.
14 красавіка яны былі прызнаныя вінаватымі ў забойстве свайго аднавяскоўца, так званага «пухавіцкага падпальшчыка» Мікалая Макарэвіча.
Забойства ўчынена 31 снежня 2008 года. Пацярпеламу было нанесена не менш за тры ўдары сякерай па галаве і ўдар у вобласць шыі. Труп злачынцы спалілі. Абвінавачаныя былі арыштаваныя і змешчаныя ў СІЗА, але ў лютым, пасля ўмяшання прэзідэнта, іх адпусцілі пад дамашні арышт.
Вярхоўны суд устанавіў, што віна абвінавачваных даказаная і іх дзеянням дадзеная правільная ацэнка. Аліферовіч быў прыгавораны Гомельскім абласным судом да пяці гадоў пазбаўлення волі з адбываннем пакарання ў папраўчай установе ўзмоцненага рэжыму, Макарэвіч — да трох гадоў пазбаўлення волі з адбываннем пакарання ў папраўчай установе ўзмоцненага рэжыму.
У сваіх касацыйных скаргах яны не аспрэчвалі кваліфікацыю злачынства, а настойвалі на змякчэнні пакарання.Аднак Вярхоўны суд прызнаў, што ў вынесеным прысудзе ўжо ўлічаныя ўсе акалічнасці, што змякчаюць віну, і ім прызначана пакаранне ніжэйшае за самую нізкую мяжу.
Як паведаміла БелаПАН адвакат Аліферовіча Раіса Прошчанка, рашэнне судовай калегіі можа быць абскарджана ў старшыні Вярхоўнага суда.
Нагадаем, яшчэ двух супольнікаў злачынства, Аляксандра Петручэню і Таццяну Юхневіч, Гомельскі абласны суд прызнаў вінаватымі ва ўкрывальніцтве злачынства. Яны пакараныя абмежаваннем волі на два і пяць гадоў адпаведна без накіравання ў папраўчыя ўстановы адкрытага тыпу.
9 чэрвеня рашэннем судовай калегіі па крымінальных справах Вярхоўнага суда Петручэня быў вызвалены ад пакарання ў сувязі з амністыяй.
