Крэмль не мае намеру прымушаць іншыя краіны прызнаваць незалежнасць Паўднёвай Асеціі і Абхазіі і не будзе каментаваць выказванні прэзідэнта Беларусі пра нібыта ціск на Мінск з боку Масквы.
Пра гэта заявіла журналістам 9 чэрвеня ў Маскве прэс‑сакратар прэзідэнта Расіі Наталля Цімакова.
«Расія ў гэтым сэнсе не будзе аказваць ніякага націску ні на якія краіны з прычыны прызнання, — цытуе прэс‑сакратара РІА Новости.
— Таму гэтыя дзіўныя выказванні Аляксандра Рыгоравіча мы пакідаем без каментараў».
Паводле слоў Цімаковай, Масква неаднаразова выказвала сваю пазіцыю адносна прызнання Абхазіі і Паўднёвай Асеціі іншымі краінамі, а прэзідэнт Дзмітрый Мядзведзеў не раз падкрэсліваў, што для Расіі прызнанне гэтых дзвюх рэспублік было адзіна магчымым захадам у існуючых умовах.
Як паведамлялася раней, сёння ж пасля перамоў у Маскве з міністрам замежных спраў Беларусі Сяргеем Мартынавым
кіраўнік расійскага МЗС Сяргей Лаўроў заявіў, што Расія ніколі не ўвязвала прызнанне незалежнасці Абхазіі і Паўднёвай Асеціі з пытаннямі практычнага ўзаемадзеяння з Беларуссю. «Мы ніколі нікога не ўпрошвалі і не будзем упрошваць прызнаваць Паўднёвую Асецію і Абхазію», — падкрэсліў Лаўроў.
«Пра тое, што гэтае пытанне будзе разглядацца ў адпаведнасці з беларускім заканадаўствам, гаварыла само беларускае кіраўніцтва. Мы з поўнай павагай ставімся да канстытуцыйных працэдур Рэспублікі Беларусь. Мы ніколі не ўвязвалі гэтую тэму з пытаннямі практычнага ўзаемадзеяння нашых дзяржаў», — сказаў расійскі міністр.
29 мая Аляксандр Лукашэнка на нарадзе з членамі ўрада і кіраўнікамі абласцей Беларусі заявіў, што «гэта не расійскае пытанне — прызнанне Паўднёвай Асеціі і Абхазіі».
«Гэта наша пытанне і гэтых дзяржаў, з якімі мы маем выдатныя кантакты, і яны ведаюць нашу тактыку», — сказаў прэзідэнт. Ён падкрэсліў, што ўжо «даўно адказаў на гэтае пытанне, і прасаваць нас ні з Усходу, ні з Захаду ў сувязі з гэтым не будзе дазволена».
«Мы незалежная суверэнная краіна і ўсё будзем рабіць у нашых інтарэсах, — падкрэсліў Лукашэнка. — Таму запомніце: ніякіх вымольванняў і выпрошванняў.
Калі няма ў іх (у Расіі. — БелаПАН.) 500 млн. даляраў, якія яны нам даўно паабяцалі, і мы спланавалі свой бюджэт адпаведна, — не хадзіце і не прасіце. Давайце будзем будаваць сваю эканоміку і палітыку як суверэнная незалежная дзяржава.У нас шмат рычагоў уздзеяння на сітуацыю і адказаў на тыя выклікі, якія нам ствараюць, у тым ліку і ў Расіі. Давайце гэта выкарыстоўваць».
Звароты Паўднёвай Асеціі і Абхазіі з просьбай прызнаць іх незалежнасць паступілі ў беларускі парламент у канцы 2008 года.
Расія прызнала незалежнасць Абхазіі і Паўднёвай Асеціі ў канцы жніўня 2008 года. Акрамя Расіі, незалежнасць гэтых рэспублік прызнала толькі Нікарагуа.
