За мінулыя выходныя былі зафіксаваныя адразу два факты нападаў на вясковыя крамы.
Так, у суботу ў Пружанскі РАУС патэлефанавала прадавачка крамы «Колас» ў вёсцы Шані Пружанскага раёна (Брэсцкая вобласць) і паведаміла, што ў гандлёвую залю зайшоў невядомы і, пагражаючы пісталетам, забраў выручку на суму 1,7 млн. руб. Рабаўнік таксама забраў 100 тыс. у аднаго з пакупнікоў. Прыхапіўшы пляшку гарэлкі, злачынца збег.
У выніку правядзення аператыўна‑пошукавых мерапрыемстваў было ўстаноўлена, што разбой здзейсніў 25‑гадовы прадпрымальнік з Брэста, які на працягу сутак быў затрыманы.
Як аказалася, малады чалавек быў вінен калі дзвюх тысячаў даляраў, і каб вырашыць фінансавыя пытанні, накіраваўся да бацькоў. Тыя не змаглі яму дапамагчы. Тады, праязджаючы ля крамы, ён прыдумаў іншы план дзе дастаць грошы. Узброіўшыся пісталетам‑запальнічкай, ён накіраваўся ў сельпо.
Як паведамляе прэс‑служба МУС, падобны выпадак здарыўся і ў вёсцы Засеклі ў Аршанскім раёне (Віцебская вобласць).
Схаваўшы твары пад капронавымі панчохамі чорнага колеру, двое злачынцаў уварваліся ў краму і сталі патрабаваць грошы ў касіра. Яны таксама пагражалі цацачным пісталетам. Не разгубіўшыся, прадавачка пачала складаць у пакет усё, што ёй трапілася пад руку. У выніку злачынцы, нічога не падазраючы, выйшлі з крамы з таварам на суму ўсяго толькі 15 тысяч рублёў.
Адным з налётчыкаў аказаўся 18‑гадовы жыхар Смалявічаў, пазней былі затрыманыя і саўдзельнікі злачынства.
