25 жніўня 1991 г. 5‑я нечарговая сесія Вярхоўнага Савета БССР прыняла закон «Аб наданні статусу канстытуцыйнага закону Дэкларацыі Вярхоўнага Савета БССР аб дзяржаўным суверэнітэце Беларускай Савецкай Сацыялістычнай Рэспублікі» і пастанову «Аб забеспячэнні палітычнай і эканамічнай самастойнасці Беларускай ССР».
Тым самым фактычна была абвешчана незалежнасць Беларусі.
Як падкрэслівае ў сваёй кнізе «Сем гадоў адраджэньня…» Сяргей Навумчык, супраць надання Дэкларацыі ад дзяржаўным сувэрэнітэце статусу канстытуцыйнага акту выступіў дэпутат Лукашэнка.
Тая сесія адбывалася на трэці пасля правалу путчу ГКЧП дзень і праходзіла досыць бурна. 24 жніўня БНФ вывеў на плошчу Леніна дзясяткі тысяч людзей, а ў залу, дзе адбываліся паседжанні, Валянцінам Голубевым, Зянонам Пазняком і Галінай Сямдзянавай быў унесены бел‑чырвона‑белы сцяг, а потым дэпутаты ад фракцыі БНФ не дапусцілі на трыбуну галоўнага камуніста Беларусі Анатоля Малафеева. 24 жніўня старшыня Вярхоўнага Савету БССР Мікалай Дземянцей падаў у адстаўку, першым кіраўніком незалежнай Беларусі стаў Станіслаў Шушкевіч, што датуль займаў пасаду намесніка старшыні.
19 верасня 1991 г. сесія Вярхоўнага Савету прыняла рашэнне называць БССР надалей Рэспубліка Беларусь, у скарочаных назвах — Беларусь.
Тады ж была прынята пастанова Вярхоўнага Савета аб дзяржаўных сімвалах. Дзяржаўным сцягам абвяшчаўся бел‑чырвона‑белы сцяг, гербам — «Пагоня».
