Сустрэча кіраўніка Беларусі з Патрыярхам прайшла ў «цёплай сяброўскай атмасферы». Але на адну з ініцыятыў Аляксандра Лукашэнкі кіраўнік РПЦ адрэагаваў вельмі рэзка.
Як вядома, кіраўнік Беларусі падчас красавіцкага візіта ў Ватыкан публічна выступіў з ініцыятывай арганізаваць сустрэчу Патрыярха з Папам Рымскім у нашай краіне.
«Сёння ёсць унікальны шанец зблізіць нашы пазіцыі», — аптымістычна сцвярджаў тады Аляксандр Лукашэнка.
Безумоўна, журналісты не маглі не пацікавіцца ў Патрыярха Кірыла, што ён думае пра высілкі Лукашэнкі ў справе арганізацыі сустрэчы кіраўніка РПЦ і пантыфіка.
Адказ маскоўскага госця аказаўся ашаламляльным.
Кірылу нічога не каштавала дыпламатычна зманеўраваць, заявіўшы, што ён высока цэніць старанні кіраўніка Беларусі. У скрайнім выпадку, можна было сказаць нешта нейтральнае «на ўся Воля Боская». Але…
— Пра гэтыя высілкі я нічога не ведаю, — адрэзаў Патрыярх.
І больш развіваць гэту тэму не стаў.
Такі адказ цяжка расцаніць інакш, як аплявуху асабіста Лукашэнку. Атрымліваецца, што кіраўнік РПЦ папросту не разгледзеў тытанічных высілак кіраўніка Беларусі па збліжэнні праваслаўнай і каталіцкай цэркваў.
Насамрэч Кірыл хітруе. Патрыярх не можа не ведаць пра ватыканскія заявы Лукашэнкі. Аднак, мяркуючы па ўсім, у вярхах РПЦ гэта ініцыятыва выклікала толькі раздражненне. Таму Кірыл дэманстратыўна праігнараваў прапанову кіраўніка Беларусі. Выразна кантрастуе з адказам Патрыярха каментар Пантыфіка (у пераказе Аляксандра Лукашэнкі). Папа Рымскі куды больш лаяльна паставіўся да ідэі кіраўніка Беларусі.
‑‑ Я бачыў яго зацікаўленасць, ‑‑ адзначыў у красавіку Аляксандр Лукашэнка. — Ён сказаў мне: Госпад, магчыма, адчыніць гэтыя дзверы, і ў хуткім часе сустрэнемся.
