У Беларусі агульная колькасць абанентаў сотавай сувязі перавысіла дзевяць мільёнаў.
Паводле інфармацыі ўпраўлення электрасувязі Міністэрства сувязі і інфарматызацыі, на 1 кастрычніка 2009 года агульная колькасць абанентаў сотавай рухомай электрасувязі дасягнула 9 млн. 77 тыс. Сотавай сувяззю ахоплена 96,6% тэрыторыі рэспублікі, на якой жыве 99,3% насельніцтва.
У адпаведнасці з дзяржаўнай формай статыстычнай справаздачнасці ў агульнай статыстыцы не ўлічваюцца абаненты, якія больш за два месяцы не карыстаюцца паслугамі аператара сотавай рухомай электрасувязі.
Цяпер у Беларусі дзейнічаюць чатыры аператары сотавай сувязі. У стандарце GSM працуюць velcom, «МТС» і «БеСТ» (гандлёвая марка life:)), у стандарце CDMA — «БелСел» (гандлёвая марка Diallog). Найбольшая колькасць абанентаў — у беларуска‑расійскага СТАА «Мабільныя ТэлеСістэмы».
Паводле звестак Белстата, у студзені—жніўні 2009 года тарыфы на паслугі сотавай сувязі ў Беларусі выраслі на 6,6% у параўнанні з такім жа леташнім перыядам.