Нягледзячы на дыпляматычны канфлікт, Латвія ня спыніць аказваць падтрымку жыхарам Беларусі ў барацьбе за дэмакратыю, заявіў сёньня ў праграме «800 сэкундаў» на LNT міністар замежных спраў Артыс Пабрыкс. «Мы не жадаем дапусьціць у Беларусі вяртаньня сталінскага рэжыму, калі людзі баяліся кожнага начнога званка», -- патлумачыў кіраўнік латвійскага МЗС.
Паводле ягоных словаў, скандал вакол латвійскага пасольства ў Менску быў ініцыяваны ня толькі дзеля таго, каб паўплываць на Латвію і Эўразьвяз. Беларускія ўлады хацелі чарговым разам прадэманстраваць сваю магутнасьць мясцоваму насельніцтву: «Калі мы так паступілі з прадстаўніком дыпляматычнай місіі краіны Эўрасаюзу, мы можам зрабіць тое ж самае зь любым з вас».
Міністар запэўніў, што Латвія і надалей будзе свабодна выдаваць візы ўсім грамадзянам Беларусі, хоць гэта не падабаецца беларускаму ўраду.
Тым часам у Латвіі разгараецца скандал вакол паказу «парнаграфічнага фільму пра жыцьцё латвійскага дыпламата Рэйма Шмітса ў Менску». Тэлеканалы LNT і TV3 паказалі фільм у прамежку часу паміж 19.50 і 20.30, у той час, як паводле закону аб радыё і тэлевізіі, рэглямэнтуе паказ сцэнаў сэксу (у тым ліку і паміж мужчынамі) пасьля 22.00. Тэлеканалы парушылі і этычныя нормы аб недатыкальнасьці прыватнага жыцьця, сьцвярджаюць латвійскія СМІ
На наступным тыдні паводзіны згаданых тэлеканалаў разьбярэ спэцыяльная камісія.
Паводле novonews.lv
