Унікальны помнік архітэктуры прэтэндуе стаць першым віртуальна рэканструяваным аб’ектам.
Гальшанскі замак. Рэканструкцыя Дзмітрыя Бубноўскага па матэрыялах Міхася Ткачова.
Метад 3D анімацыі можа быць выкарыстаны пры рэканструкцыі замку ў Гальшанах, паведаміла загадчыца сектара ўпраўлення па ахове гісторыка-культурнай спадчыны і рэстаўрацыі Міністэрства культуры Беларусі Наталля Хвір. Яна адзначыла, што сёння ва ўсім свеце аднаўленне аб’ектаў гісторыка-культурнай спадчыны — гэта не абавязкова будаўніцтва. Рэшткі аб’екта кансервуюцца, а поўнае ўяўленне аб ранейшым яго выглядзе можна атрымаць, выкарыстаўшы метад віртуальнай рэканструкцыі.
У цяперашні час у Беларусі ў Дзяржаўны спіс гісторыка-культурных каштоўнасцяў уключана 4587 аб’ектаў, з іх больш за 1500 помнікаў архітэктуры. Н. Хвір распавяла, што рэканструкцыя аб’ектаў гісторыка-культурнай спадчыны вядзецца ў рэспубліцы ў адпаведнасці з Дзяржаўнай інвестыцыйнай праграмай, асноўнымі аб’ектамі якой з’яўляюцца Мірскі і Нясвіжскі замкі. У цяперашні час у Беларусі сфарміраваны спіс з 31 аб’екта, якія знаходзяцца ў нездавальняючым стане і будуць перадавацца інвестарам для рэстаўрацыі. Інфармацыю аб аб’ектах можна атрымаць у абласных выканаўчых камітэтах.
Як дадаў у сваю чаргу дэкан архітэктурнага факультэта Беларускага нацыянальнага тэхнічнага ўніверсітэта Армэн Сардараў, важна, каб пасля выканання рэстаўрацыйных работ аб’ект не губляў дух даўніны. Часта выкарыстанне сучасных будматэрыялаў ператварае аб’ект у гламурны. А. Сардараў дадаў таксама, што ў 2010 годзе ўпершыню з сценаў універсітэта выйдуць дыпламаваныя рэстаўратары-архітэктары. Гэта будзе першы выпуск у колькасці 14 чалавек.
