У чатырох кантрольных гарадах Віцебскай вобласці — Віцебску, Оршы, Полацку і Наваполацку — да канца гэтага тыдня падоўжаны каранцінныя мерапрыемствы ў школах і лячэбных установах,паведамілі ў Віцебскім абласным цэнтры гігіены, эпідэміялогіі і грамадскага здароўя.
Гэта зроблена на падставе рашэнняў упраўлення аховы здароўя Віцебскага аблвыканкама і галоўнага санітарнага ўрача вобласці.
Паводле звестак абласнога цэнтра гігіены, эпідэміялогіі і грамадскага здароўя, з 1 па 15 лістапада ў вобласці дыягназ «грып» і «ВРВІ» быў пастаўлены 60.602 хворым, з якіх 28.133 (42,9%) — дзеці. Шпіталізаваныя 1.751 чалавек, з іх 54,8% — дзеці.
У Віцебску, Оршы, Полацку і Наваполацку школы знаходзяцца на каранціне ўжо амаль два тыдні. Першы раз каранцінныя мерапрыемствы ў кантрольных гарадах рэгіёна былі аб’яўленыя з 4 па 10 лістапада, затым яны былі падоўжаныя да 15 лістапада.
16 лістапада ў школах быў звычайны навучальны дзень, але ў другой палове дня школьнікам паведамілі аб падаўжэнні канікул.
0
0
0
0
0
0
