З 24 снежня 2009 года па 8 студзеня 2010 года органы ўнутраных спраў Беларусі будуць несці службу ва ўзмоцненым рэжыме.
Пра гэта паведаміў першы намеснік начальніка галоўнага ўпраўлення аховы правапарадку і прафілактыкі МУС Аляксандр Барсукоў на прэс‑канферэнцыі ў Мінску 15 снежня.
Паводле яго слоў, у забеспячэнні правапарадку ў навагоднія святы плануецца задзейнічаць прыблізна 10 тысяч супрацоўнікаў органаў унутраных спраў і ваеннаслужачых унутраных войскаў, у тым ліку ў Мінску — прыкладна тры тысячы.
Пад асаблівы кантроль будуць узяты месцы правядзення масавых мерапрыемстваў. Яны будуць агароджаны турнікетамі, абследаваны піратэхнічнымі групамі.
Агляд пры праходжанні на агароджаныя тэрыторыі будзе ажыццяўляцца ручнымі і стацыянарнымі металадэтэктарамі.
Сярод асноўных месцаў правядзення свят у Мінску — Кастрычніцкая плошча і тэрыторыя каля стэлы «Мінск — горад‑герой». Феерверк блізу стэлы пачнецца 1 студзеня ў 1.30.
Прапускаць гледачоў на яго плануецца праз восем КПП.
На Кастрычніцкай плошчы ў навагоднюю ноч будуць працаваць прыкладна 2.300 супрацоўнікаў міліцыі ў форме і прыкладна 100 — у цывільным адзенні. Гэтая плошча, як і іншыя месцы масавых мерапрыемстваў, будзе знаходзіцца пад відэаназіраннем. Інфармацыя будзе паступаць у штаб у МУС.
Барсукоў паведаміў, што традыцыйна продаж спіртнога ў месцах правядзення масавых мерапрыемстваў і ў радыусе 500 метраў ад іх будзе забаронены за дзве гадзіны да пачатку святкавання.
Акрамя таго, міліцыя прапануе ў навагоднюю ноч пасля 21.00 забараніць продаж спіртнога ў кругласутачных крамах.
Барсукоў паведаміў, што напярэдадні святаў праваахоўныя органы актывізавалі працу па канфіскацыі вадкасці з утрыманнем спірту, напрыклад ачышчальнікаў шкла, якія кантрабандысты спрабуюць увозіць у Беларусь. З абароту выключана ўжо 1 млн. 606 тон такой прадукцыі.
Акрамя таго, ужо канфіскавана больш як 1,7 млн. адзінак піратэхнікі (за апошнія паўтара месяцы 2008 года — 480 тыс.).
Як паведаміў начальнік аддзела арганізацыі медыцынскай аховы пры надзвычайных сітуацыях Міністэрства аховы здароўя Алег Панчук, у ноч з 31 снежня 2008 года на 1 студзеня 2009 года ў медыцынскія ўстановы з рознымі траўмамі ў выніку выкарыстання піратэхнікі звярнуліся 56 чалавек.