Літва зацікаўленая ў тым, каб Беларусь была незалежнай дзяржавай, а не правінцыяй іншай вялікай дзяржавы. Аб гэтым заявіла міністр абароны Літвы Раса Юкнявічэне на сустрэчы з беларускімі журналістамі ў Вільні.Паводле яе словаў, Літва зацікаўленая ў тым, каб межаваць «з Беларуссю, а не з нейкай іншай вялікай дзяржавай. Літва зацікаўлена ў кантактах з беларускімі ўладамі таму, што мы бачым, як вакно злёгку адчынілася, але яно можа і зачыніцца. Няма ўпэўненасці ў шчырасці гэтай адкрытасці» -- заявіла на сустрэчы з беларускімі журналістам у Вільні міністр абароны Літвы.
«У сферы абароны ў нас пакуль што няма кантактаў з беларускімі ваеннымі. У вас праходзілі сумесныя з Расіяй вучэнні, што нас, вядома, не задавальняе. Мы хацелі б, каб вашыя ваенныя мелі больш сувязяў з дзяржавамі НАТО, каб яны ўбачылі альтэрнатыву» -- адзначыла Р.Юкнявічэне.
Па яе словах, яна накіроўвала запрашэнне былому міністру абароны Беларусі наведаць Літву, але ў ваенным ведамстве Беларусі адбыліся перамены. Запрашэнне застаецца ў сіле і для новага міністра.
Р.Юкнявічэне нагадала пра ідэю стварыць сумесную ўкраінска-польска-літоўскую брыгаду і, па яе словах, «калі ў Беларусі працэсы пойдуць нармальным, еўрапейскім шляхам, то чаму б не мець такога партнёрства з нашымі найбліжэйшымі суседзямі. Гэта амбітная ідэя, але мы не адмаўляемся ад яе. Пакуль Беларусь глядзіць толькі ў бок адной дзяржавы -- мы бачым мяжу, якая праходзіць паміж Літвой і Беларуссю. Не думаю, што гэта выгадна беларусам і нам. Мы б хацелі, каб было больш супрацоўніцтва. Літва нікому не пагражае. А легенда і сцэнар расейска-беларускіх вучэнняў былі вельмі дзіўнымі. Гэта нагадала мне часы халоднай вайны».
Міністр упэўненая, што падобныя вучэнні не з'яўляюцца пагрозай НАТА, як арганізацыі, таму што «НАТА нашмат мацней і зможа даць адказ».
Р. Юкнявічэне адзначыла, што той факт, што вучэнні праходзілі на тэрыторыі Беларусі, тлумачыцца імкненнем паказаць, што Беларусь з'яўляецца сферай уплыву іншай дзяржавы. Яна не ўдакладніла, што гэта за «іншая дзяржава».
