Расія папярэдзіла Беларусь пра магчымасць пазбаўлення квот на бяспошлінную пастаўку нафты ў выпадку павелічэння кошту транзіту расійскай нафты праз беларускую тэрыторыю.
Адпаведны ліст нібыта паступіў з Масквы ў Савет міністраў Беларусі, паведамілі блізкія да беларуска‑расійскіх перамоваў крыніцы.
У лісце ўказана на неабходнасць абавязковага ўзгаднення з расійскім бокам механізму тарыфнага рэгулявання пры транспартаванні нафты па сістэме беларускіх магістральных нафтаправодаў. Пры гэтым у дакуменце падкрэсліваецца, што рашэнне Расіі аб бязмытным пастаўках у Беларусь у 2010 годзе 6,3 млн тон нафты з’яўляецца «жэстам добрай волі»,
і, калі такія ўмовы беларускі бок не задавальняюць, Расія гатовая перайсці на рынкавыя ўмовы паставак.
У канцэрне «Белнафтахім» інфармацыю пра ліст пракаментаваць не змаглі. Не змог пацвердзіць гэтыя звесткі і прэс‑сакратар прэм’ер‑міністра Беларусі Аляксандр Цімашэнка.
«Праз мяне такі ліст не праходзіў», — сказаў ён.
Напярэдадні Цімашэнка абверг інфармацыю аб змене пазіцыі Беларусі на перамовах з Расеяй аб пастаўках нафты, распаўсюджаную шэрагам СМІ.
Інфармацыя аб змяненні пазіцыі Беларусі на перамовах з Расіяй аб пастаўках нафты, распаўсюджаная некаторымі СМІ, не адпавядае сапраўднасці, заявіў прэс‑сакратар беларускага прэм’ер‑міністра Аляксандр Цімашэнка.
Ён падкрэсліў, што
беларуская пазіцыя па пытаннях пастаўкі нафты выкладзена ў лісце Аляксандра Лукашэнкі, накіраваным Дзмітрыю Мядзведзеву.
Гэтая пазіцыя, заўважыў Цімашэнка, «не мае нічога агульнага з пазіцыяй, агучанай нейкай крыніцай у органах дзяржкіравання», на якую спасылаліся СМІ.
У лісце Лукашэнкі, нагадаем, гаварылася: 10 снежня 2009 года ў ходзе пасяджэння Вышэйшага дзяржсавета Саюзнай дзяржавы Беларусі і Расіі прэзідэнтамі дзвюх краін была дасягнута дамоўленасць, што на працягу двух‑трох месяцаў 2010 года нафта будзе пастаўляцца ў Беларусь бяспошлінна, і за гэты час бакі ўзгодняць умовы далейшай пастаўкі нафты. Аднак потым Расійская Федэрацыя фактычна адмовілася ад выпрацаваных дамоўленасцей і вылучыла непрымальныя для Беларусі ўмовы».
Апошні раунд перамоў па пастаўках нафты адбыўся ў Маскве 9 студзеня.
Пасля вяртання беларускай дэлегацыі ў Мінск прэс‑служба Савета міністраў Беларусі паведаміла, што «беларускі бок выставіў свае аргументы на аснове прававой базы двухбаковых адносінаў, падмацаваўшы разлікамі, раней узгодненымі экспертамі, аднак перамоўшчыкі з боку Расіі не ўзялі гэта пад увагу».
Дата аднаўлення перамоў пакуль невядомая.
Сёння ў канцэрне «Белнафтахім» заявілі, што расійская нафта на беларускія заводы паступае і вядзецца праца па заключэнні новых кантрактаў з расійскімі нафтавымі кампаніямі.
