У аўторак прайшоў першы матч фіналу Кубку Беларусі па хакеі, у якім сышліся два менскія клюбы – «Дынама», якое перамагло ў аналягічным турніры летась, і «Керамін». На матч сабралася паглядзець больш за тысячу аматараў хакею.
Па імёнах «дынамаўцы» мелі істотную перавагу, большасьць гульцоў якога апранала саколкі нацыянальнай зборнай на чэмпіянатах сьвету. Чаго толькі вартыя прозьвішчы братоў Мікульчыкаў, Макрыцкага, Хмыля, Скабелкі, Журыка, Дудзіка, Круцікава. Але добра вядома, што ў спорце ня ўсё вырашаюць асобы, добры прыклад «Юнацтва», якое ўзмацніўшыся вядомымі беларускімі легіянэрамі кшталту Грабоўскага, ня здолела трапіць у фінал.
Аднак у гэты вечар зоркі зрабілі сваю справу. У кожным з пэрыядаў «дынамаўцы» закінулі па шайбе. Прычым ўсе галявыя посьпехі належаць легіянэрскай гвардыі пераможцаў. Спачатку пасьля перадачаў аксакалаў Макрыцкага і Антоненкі шайбу закінуў гулец зборнай Украіны Алег Шафарэнка, які летась гуляў за магілёўскае «Хімвалакно».
У другім пэрыядзе, калі ў абедзьвюх камандаў былі на лёдзе ня роўныя склады, посьпех прыйшоў ужо да гульца нацыянальнай зборнай Латвіі Анкіпанса. Прапусьціўшы дзьве шайбы «керамінаўцы» былі вымушаны шукаць шчасьце ў чужых варот, але атрымалі яшчэ адну шайбу ў свае. Атаку, якую пачаў брамнік Леанід Фацікаў удала скончыў фартовы Шафарэнка.
«Дынама» перамагло заслужана. Што датычыць «Кераміну», то няясна за кошт якіх якасьцяў клюб можа перамагчы ў паўторным паядынку, які пройдзе ў чацьвер у Хакейным палацы а 18:30. Ня выключана, што ў чацьвер на паядынку будуць прысутнічаць высокія дзяржаўныя чыноўнікі з міністрам МУС – старшынём фэдэрацыі хакею па сумяшчальніцтве – Уладзімерам Навумавым уключна.
