Беларусь ставіць пад пытанне мэтазгоднасць існавання Мытнага саюза пры захаванні пошліны на нафту.
Збіранне пошліны на расійскую нафту, якая пастаўляецца ў Беларусь, супярэчыць прынцыпам адзінай мытнай прасторы, заявіў намеснік дырэктара дэпартамента знешнеэканамічнай дзейнасці Міністэрства замежных спраў Антон Кудасаў на прэс‑канферэнцыі ў Мінску 19 лютага.
Ён нагадаў, што зараз пастаўкі сырой нафты ў Беларусь рэгулююцца беларуска‑расійскім міжурадавым пратаколам ад 27 студзеня 2010 года, які «легалізуе прымяненне расійскім бокам гэтай пошліны». «Гэты пратакол не адпавядае прававой базе Мытнага саюза і тым дакументам, якія прыняты ў сувязі з рашэннем прэзідэнтаў Беларусі, Расіі і Казахстана стварыць адзіную мытную тэрыторыю з 1 ліпеня 2010 года», — падкрэсліў Кудасаў.
На яго думку,
неабходна правесці трохбаковыя перамовы, «якія павінны прывесці да зразумелай сістэмы экспарту нафты з Расіі ў Беларусь і Казахстан без збірання мытаў».
«Я спадзяюся, што такія перамовы ў хуткім часе будуць праведзены», — заявіў прадстаўнік МЗС.
Пры гэтым ён дадаў, што перамоўны працэс «будзе цяжкім». «Пытанне стаіць, ці гатовы ў Расіі мадыфікаваць сваю сістэму збірання рэнты з прыродных рэсурсаў», — растлумачыў Кудасаў.
«Калі гэтага не адбудзецца, адзіную мытную тэрыторыю, унутры якой бярэцца пошліна, нельга ўявіць. Тут узнікае пытанне аб выкананні рашэння ўрадаў аб стварэнні такой тэрыторыі», — падкрэсліў прадстаўнік МЗС. Паводле яго слоў, «калі мае месца адступленне ад нейкіх базавых прынцыпаў Мытнага саюза ў адносінах да нафты і нафтапрадуктаў, то ёсць адступленне ад міжнародных правілаў у адносінах да аднаго тавару, вельмі важнага з пункту гледжання нашых інтарэсаў, то выключыць нічога нельга».
Кудасаў таксама пракаментаваў інфармацыю некаторых расійскіх СМІ аб магчымым увядзенні Расіяй увазной пошліны на прыродны газ. «Увядзенне пошліны любога памеру на прыродны газ, што пастаўляецца ў Беларусь,
будзе з’яўляцца прамым парушэннем дзейных пагадненняў паміж бакамі», — заявіў ён.
Як паведамлялася раней, да 1 сакавіка Мінэканамразвіцця РФ плануе падрыхтаваць праект пагаднення аб пастаўках нафты ў межах Мытнага саюза.
«Да 1 сакавіка мы павінны падаць праект пагаднення ва ўрад. Гэта праект, звязаны з адміністраваннем вывазных мытных пошлін», — заявіў 9 лютага ў Маскве намеснік дырэктара зводнага дэпартамента аналізу і рэгулявання знешнеэканамічнай дзейнасці Мінэканамразвіцця Андрэй Точын.
Паводле яго слоў, на працягу сакавіка ўдзельнікі Мытнага саюза павінны дамовіцца па экспартных пошлінах на нафту. Пакуль жа іх адміністраванне застаецца на нацыянальным узроўні і, як зазначыў чыноўнік, будзе захоўвацца такім працяглы час. Гэта звязана з тым, што экспартныя пошліны з’яўляюцца не толькі рэгуляцыйнымі, але частка з іх з’яўляюцца таварнай рэнтай (у тым ліку па нафце), растлумачыў ён. Такім чынам, сказаў Точын, бакам давядзецца дамаўляцца, якія механізмы адміністравання экспартных пошлін будуць прымяняцца, каб экспарцёры не мелі магчымасці адыходзіць ад выплаты гэтай рэнты за кошт вывазу тавараў з тэрыторыі Беларусі ці Казахстана.
