Паводле звестак аналітычнага цэнтра Realt.by, за тыдзень, з 29 сакавіка па 5 красавіка, сярэдняя цана прапановы квадратнага метра кватэр на другасным рынку жылля ў Мінску паменшылася на 0,62% і склала 1.436 даляраў. Зніжэнне цэн назіраецца на працягу пяці апошніх тыдняў.
На 5 красавіка лідэрамі па велічыні сярэдніх цэн прапановы кватэр у Мінску з’яўляюцца Цэнтральны (1.687 даляраў за кв. м) і Савецкі (1.568) раёны. Самыя нізкія цэны ў Завадскім (1.300) і Маскоўскім (1.377) раёнах. За тыдзень цэны на кватэры на 0,36% павялічыліся ў Цэнтральным, на 0,14% — у Фрунзенскім і Кастрычніцкім раёнах. У астатніх раёнах сталіцы цэны панізіліся ў межах 0,15—3,24%, больш за ўсё — у Партызанскім.
Сярэдняя цана прапановы кватэр на 5 красавіка па пакоях (і змяненне за тыдзень) склала: аднапакаёвых — 1.516 даляраў/кв.м (зніжэнне на 0,59%), двухпакаёвых — 1.439 даляраў/кв.м (зніжэнне на 0,21%), трохпакаёвых — 1.377 даляра/кв.м (зніжэнне на 0,86%), чатырохпакаёвых — 1.353 даляра/кв.м (зніжэнне на 2,66%).
Лідэрам па аб’ёме прапановы другаснага жылля ў Мінску застаецца Фрунзенскі раён — 21%.
Менш за ўсё прапаноў у Партызанскім раёне — 5%. Аднапакаёвых кватэр прапаноўвалася 29%, двухпакаёвых — 34%, трохпакаёвых — 29%, чатырохпакаёвых — 8%.
Кватэры ў новабудоўлях Мінска прапануюцца па камерцыйных цэнах ад 700 да 3 тыс. даляраў за квадратны метр.
Сярэдняя цана прапановы долевага будаўніцтва кватэр і новабудоўляў у Мінску складае 1.298 даляраў/кв.м, што на 2% больш, чым тыдзень таму, і на 4,4% больш, чым у пачатку года.
Для параўнання: паводле ўкраінскага партала нерухомасці Realt.ua,
сярэдняя цана на другасным рынку Кіева за тыдзень павялічылася на 0,6% і склала 2.222 даляра/кв.м.
Сярэдняя цана кватэр на першасным рынку Кіева за гэты перыяд паменшылася на 1,7% і складае 1.761 даляр/кв.м.
Паводле даных партала нерухомасці irn.ru, сярэдняя цана на другасным рынку Масквы за тыдзень павялічылася на 0,5% і на 5 красавіка складае 4.279 даляра/кв.м.
