Міністэрства энергетыкі Расіі спадзяецца, што «Газпрому» не давядзецца прымяняць санкцыі да Беларусі. Пра гэта журналістам заявіў міністр энергетыкі Сяргей Шматко 17 чэрвеня ў рамках міжнароднага эканамічнага форуму ў Санкт‑Пецярбургу.
«Я выказваю свой аптымістычны пункт гледжання пра тое, што беларускія калегі змогуць выканаць свае кантрактныя абавязацельствы і разлічыцца з «Газпромам». І не будзе ніякай неабходнасці ў прымяненні прадугледжаных кантрактам санкцый з боку «Газпрома», — цытуе Шматко РІА Новости.
Паводле яго слоў, у выпадку прыняцця рашэння аб абмежаванні паставак газу ў Беларусь расійскі бок будзе зыходзіць з таго, што трэба забяспечыць усю неабходную жыццядзейнасць прамысловых аб’ектаў.
У сваю чаргу намеснік кіраўніка «Газпрома» Валерый Голубеў заявіў журналістам, што Беларусь абяцае разлічыцца з даўгамі за пастаўкі расійскага газу. «Кожны дзень абяцаюць заплаціць», — абвясціў намеры беларускага боку Голубеў. Ён не назваў магчымы аб’ём скарачэння паставак газу ў выпадку непагашэння даўгоў.
«Ды што вы перажываеце, яны возьмуць і заплацяць. Усё даведаецеся 21 чэрвеня», — дадаў Голубеў.
Як паведамлялася раней, 16 чэрвеня «Газпром» папярэдзіў беларускі бок, што ў выпадку калі сітуацыя з доўгам не будзе ўрэгулявана да 21 чэрвеня, пастаўкі газу ў краіну могуць быць абмежаваны.
Паводле звестак «Газпрома», доўг «Белтрансгаза» за імпартаваны расійскі газ на 1 мая складаў 192 млн. даляраў. Гэта стала следствам аплаты газу па больш нізкай, чым прадугледжана кантрактам, цане. Так, кошт тысячы кубаметраў газу складае 169 даляраў, аднак Беларусь разлічваецца за газ па леташняй цане — 150 даляраў.
Разам з тым, беларускі бок прыводзіць іншыя звесткі. Паводле інфармацыі Белстата, сярэдняя цана імпарту 1 тыс. куб. м газу ў студзені—красавіку склала 174 даляры. Запазычанасць за газ на 1 мая склала 392,8 млрд. рублёў, ці прыблізна 130 млн. даляраў.
