Аляксандр Лукашэнка павіншаваў прэзідэнта Дзяржавы Ізраіль Шымона Перэса з 87-годдзем.
Паводле інфармацыі прэс-службы беларускага прэзідэнта, у віншаванні адзначаецца, што Шымона Перэса ведаюць у Беларусі як "паслядоўнага і самаадданага дзяржаўнага дзеяча, які прысвяціў сваё жыццё будаўніцтву квітнеючага Ізраіля".
"З задавальненнем адзначаю, што, дзякуючы Вашай асабістай увазе, паміж нашымі краінамі існуе атмасфера даверу, паспяхова развіваецца беларуска-ізраільскае канструктыўнае супрацоўніцтва", — цытуе віншаванне прэс-служба.
***
Шымон Перэс нарадзіўся 2 жніўня 1923 года ў Вішневе Валожынскага павета Польшчы (цяпер — Валожынскі раён Мінскай вобласці). Найстарэйшы ізраільскі палітык, чыя палітычная кар'ера доўжыцца больш за 65 гадоў. Шматгадовы член Кнесета (з 1959 года па 2006 год). З 1984 года па 1986-ы і з 1995-га па 1996 год займаў пасаду прэм'ер-міністра. Лаўрэат Нобелеўскай прэміі міру 1994 года (сумесна з Ясірам Арафатам і Іцхакам Рабінам). 13 чэрвеня 2007 года быў абраны дзевятым па ліку прэзідэнтам Дзяржавы Ізраіль.
