Пра мястэчка Мір чуў кожны яшчэ са школы. Вядома ж – там знаходзіцца самы знакаміты беларускі замак. Яго выявы ўпрыгожваюць усе даведнікі па гісторыі і культуры нашай краіны.
Рынкавая плошча ў Міры. Пачатак ХХ ст.
Вуліца Касцёльная. 20-30 гады.
Від на замак. 20-30 гады.
Князь Святаполк-Мірскі за шахматамі.
Аднак замак – не адзінае, чым можа пахваліцца гэтае мястэчка. Мір на працягу стагоддзяў ўбіраў у сябе ўсё тое, што адбывалася на беларускай зямлі. Гэтае невялікае мястэчка – як маленькі адбітак Беларусі.
Даследчыкі Ірына Махоўская і Ірына Раманава вырашылі раскрыць унікальнасць і хараство мястэчка Мір не зусім звычайным спосабам. Яны выдалі кнігу, складзеную з успамінаў аб Міры колішніх яго жыхароў. Такі папулярны на Захадзе стыль вуснай гісторыі ў нас пакуль з’яўляецца рэдкасцю. І вельмі шкада, бо менавіта дзякуючы жывым галасам можна дакладна ўявіць сабе, якім было такое недалёкае ад нас па часе і такое адрознае па стылю жыццё ў беларускіх мястэчках першай паловы ХХ стагоддзя.
З кнігі можна даведацца, як местачкоўцы рэагавалі на першага ўбачанага мурына, якога прывёз у Мір князь Святаполк-Мірскі, чаму яны так моцна неўзлюбілі жонку новага ўладальніка замка і за што ўзненавідзелі савецкую ўладу. А таксама пра самыя звычайныя моманты жыцця мястэчка, якія не адлюстраваныя ні ў адной манаграфіі, альбо навуковым даследаванні.
