У сталіцы 11 верасня адбылася цырымонія ўшанавання новых уладальнікаў ганаровага звання «Мінчанін года».
Як адзначыў старшыня Мінгарвыканкама Мікалай Ладуцька, сёлета ўзнагароды атрымалі 13 мінчан. Ганаровае званне прысуджаецца дзесяты раз. Ужо больш за 100 чалавек удастоены гэтага звання «за высокія дасягненні ў працы, асаблівы асабісты ўклад у сацыяльна-эканамічнае і культурнае развіццё горада». Традыцыйна цырымонія ўзнагароджання праходзіць у Дзень горада.
Сёлета ўзнагароды ўручаны: у галіне прамысловасці — генеральнаму дырэктару РУП «Белмедпрэпараты» Віктару Залесскаму; транспарту і сувязі — вадзіцелю тралейбуса філіяла «Тралейбусны парк № 4» КУП «Мінсктранс» Вячаславу Пупко; будаўніцтва — кіраўніку ААТ «Трэст № 15 «Спецбуд» ДВА «Мінскбуд» Мікалаю Мілашэўскаму; ЖКГ — слесару-сантэхніку4-га разраду дзяржаўнага даччынага УП «ЖЭС № 39 ЖРЭА Заводскага раёна Мінска» Віктару Рыдкіну.
У сферы аховы здароўя ганаровае званне атрымаў галоўны ўрач установы аховы здароўя «7-я гарадская стаматалагічная паліклініка» Уладзімір Краўчанка (бацька першага намесніка кіраўніка Адміністрацыі прэзідэнта Наталлі Пяткевіч — НН); вышэйшай адукацыі і навукі — прарэктар па вучэбнай рабоце і сацыяльных пытаннях Беларускага дзяржаўнага ўніверсітэта інфарматыкі і радыёэлектронікі Аляксандр Хмыль; сярэдняй адукацыі — настаўнік беларускай мовы і літаратуры СШ № 43 Алеся Зяневіч; культуры — настаўнік музыкі гімназіі № 14, кіраўнік заслужанага аматарскага калектыву фальклорнага ансамбля «Дударыкi» Дзмітрый Равенскі; фізкультуры, спорту і турызму — спартсмен-інструктар нацыянальнай каманды Беларусі па біятлоне Дар’я Домрачава; сацыяльнай абароны насельніцтва — старшыня праўлення Мінскай гарадской арганізацыі ГА «Беларускае таварыства інвалідаў» Людміла Калмыкова; гандлю і грамадскага харчавання — дырэктар ЗАТ «Універсам Першамайскі» Зінаіда Паборцава; бытавога абслугоўвання — заснавальнік ПУП «Фэмістыль» Вольга Прышчэпава; у праваахоўнай сферы і органаў НС — камандзір аддзялення пажарнай аварыйна-ратавальнай часткі № 24 Савецкага раённага аддзялення Мінскага гарадскога ўпраўлення МНС Сяргей Вечар.
Згодна з рашэннем Мінгарвыканкама ўладальнікі звання атрымалі дыпломы, нагрудныя знакі і грашовае ўзнагароджанне ў памеры 25 базавых велічынь (875 тыс. рублёў).
Марына Носава, БелаПАН
Хочаш падзяліцца важнай інфармацыяй ананімна і канфідэнцыйна?
Пішыце рэдактару «Нашай Нівы» ў ТГ
