Пачаўся візіт у Мінск дырэктара аддзела Сусветнага банка

13 верасня пачаўся візіт у Беларусь дырэктара аддзела Украіны, Беларусі і Малдовы Сусветнага банка Марціна Райзера.

Як паведамілі ў прадстаўніцтве банка, падчас візіту, што будзе доўжыцца пяць дзён, будуць абмяркоўвацца пытанні наяўнай сацыяльна-эканамічнай сітуацыі, першачарговых мер эканамічнай палітыкі краіны, ход рэалізацыі і падрыхтоўкі праектаў, падтрыманых Сусветным банкам, аналітычная праца, а таксама перспектывы далейшага супрацоўніцтва Беларусі і СБ.

Марцін Райзер правядзе сустрэчы ва ўрадзе, Нацыянальным банку і Адміністрацыі прэзідэнта, з прадстаўнікамі міжнароднай супольнасці, бізнес- і аналітычных колаў. Возьме ўдзел у абмеркаваннях, што пройдуць падчас візітаў экспертаў Сусветнага банка, якія працуюць у краіне, па пытаннях макраманіторынгу, прыватызацыі, падаткова-бюджэтнай палітыкі.

16 верасня запланавана паездка Райзера ў Брэст, дзе ён сустрэнецца з кіраўніцтвам вобласці і наведае свабодную эканамічную зону «Брэст».

Нагадаем, у снежні 2009 года Беларусь атрымала ад Сусветнага банка пазыку на мэты развіцця ў 200 млн. долараў ЗША. Сродкі прызначаны на падтрымку эканамічнай праграмы ўрада, прадухіленне сацыяльных наступстваў крызісу і паглыбленне структурных рэформаў, якія забяспечваюць аснову для аднаўлення ўстойлівага эканамічнага росту.

Беларусь стала членам Сусветнага банка ў 1992 годзе. За гэты час краіне было выдзелена 643 млн. долараў ЗША на рэалізацыю дзевяці праектаў; прыкладна 30 нацыянальных праграм атрымалі грантавую падтрымку на 18 млн. долараў ЗША. Беларусь выкарыстоўвае сродкі СБ для фінансавання чатырох праектаў па развіцці інфраструктуры.

Аляксей Арэшка, БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ