30 лістапада Уладзімір Някляеў наведае Віцебскую вобласць, Яраслаў Раманчук — Магілёў, Віталь Рымашэўскі паляціць у Брусель, Андрэй Саннікаў рыхтуецца да выступлення на тэлебачанні 1 снежня,
паведамілі ў штабах кандыдатаў у прэзідэнты.
Някляеў наведае Полацк, дзе ў 15.15 ускладзе кветкі да помніка Францыску Скарыну. З 16.00 да 18.00 у яго запланавана сустрэча з выбаршчыкамі горада (ДК "Шкловалакно"). Пасля гэтага Някляеў паедзе ў Наваполацк, дзе правядзе сустрэчу з выбаршчыкамі з 19.00 да 21.00 (ААТ "Нафтан").
Раманчук мае намер наведаць Магілёў. Асноўная сустрэча з выбаршчыкамі ў яго будзе з 18.00 да 20.30 у Архітэктурна-будаўнічым каледжы. Перад гэтым Раманчук наведае шэраг аб'ектаў горада: 10.00—11.30 — рынак "Быхаўскі", 11.30—13.00 — рынак "Віленскі", 13.00—14.00 — Магілёўскі дзяржаўны ўніверсітэт, 15.00—16.00 — прахадная ВА "Магілёўхімвалакно", 16.30—17.30 — пляцоўка каля цэнтральнага Дома быту.
Саннікаў сустрэч з выбаршчыкамі не плануе. Ён правядзе шэраг перамоў у вузкім коле і будзе рыхтавацца да выступлення на тэлебачанні, якое павінна адбыцца 1 снежня.
Рымашэўскі запіша выступленне на радыё, пасля чаго мае намер вылецець у Брусель, дзе ў яго запланаваны шэраг сустрэч з замежнымі партнёрамі. Варта зазначыць, што 30 лістапада Цэнтрвыбаркам павінен разгледзець у дачыненні да яго пытанне аб санкцыях за правядзенне ў цэнтры Мінска сустрэчы з выбаршчыкамі 24 лістапада на Кастрычніцкай плошчы. Самога Рымашэўскага на разглядзе не будзе — яго інтарэсы прадставяць кіраўнік выбарчага штаба Павел Севярынец і давераная асоба кандыдата ў ЦВК з правам дарадчага голасу Таццяна Шапуцька.
Па ТВ сёння выступяць Дзмітрый Ус (19:00) і Мікалай Статкевіч (19:30).
