Сёньня кандыдаты ў прэзыдэнты праводзілі сустрэчы з выбарцамі, некаторыя рыхтаваліся да ўдзелу ў радыёдэбатах.
Уладзімер Някляеў узяў сёньня ўдзел у сустрэчы з выбарцамі на пікеце каля Камароўскага рынку ў Менску. Як толькі спадар Някляеў пачаў прамаўляць побач пачаўся канцэрт, дзе агітавалі за дзейнага кіраўніка краіны.
"Вось пайшло-паехала. І самае цікавае, што там будуць сьпявацца песьні на вершы Уладзімера Някляева. У іх і песень нават сваіх няма. Няма нічога свайго, няма нацыянальнай ідэі, таго, што б яны маглі сказаць беларусам ад душы, ад сэрца. Адна прапаганда, адны пустыя, фальшывыя словы".
Адзін з удзельнікаў сустрэчы пацікавіўся, чаму Някляеў пакінуў тэледэбаты?
"Падчас прэзыдэнцкіх выбараў той чалавек, які пры ўладзе, павінен дэбатаваць з тымі людзьмі, з тым чалавекам, які хоча на ягонае месца прыйсьці. І адказваць на пытаньні: дзе грошы, чаму мы ўсе жывём бедна, чаму прадпрымальнікам перадушваюць горла і гэтак далей. А ён павінен пытацца, што я зраблю, каб было інакш. Вось што такое палітычныя дэбаты. А нас паставілі пад нумарамі, нібыта мы на іпадроме нейкія коні. Вось кожнаму нумар і мы павінны былі па гэтых дзевяці дарожках пабегчы, выхваляючыся, у каго з нас рысь лепшая ці што? Таму ня маючы магчымасьці дэбатаваць з тым чалавекам, які пры ўладзе, я палічыў, што браць удзел у гэтых дэбатах ня мае ніякага толку".
У камандзе Някляева паведамілі, што ў сёньняшніх радыёдэбатах замест кандыдата возьме ўдзел яго давераная асоба. А сам Някляеў правядзе яшчэ адну сустрэчу з выбарцамі ў Менску.
Таксама замест радыёдэбатаў Андрэй Саньнікаў абраў паездку па рэгіёнах, ён праводзіць сустрэчы з выбарцамі ў Гомелі і Жлобіне.
Ня возьме ўдзелу ў радыёдэбатах і кандыдат у прэзыдэнты Мікола Статкевіч. Замест яго прыйдзе кіраўнік выбарчага штабу Сяргей Марцылеў. А Статкевіч пачынае візыт у Бэрлін, дзе возьме ўдзел у канфэрэнцыі на запрашэньне нямецкіх сацыял-дэмакратаў.
"Мне і маім паплечнікам па партыі не зусім зразумелая палітыка шэрагу эўрапейскіх дзяржаў адносна Беларусі. Калі мы не разумеем і асуджаем дзеяньні дэмакратычнай Эўропы, то гэта б'е па нашых ідэалах. А мы ж трымаемся дзякуючы гэтым ідэалам, веры ў іх. Мы хацелі б атрымаць тлумачэньні гэтай "рэал-палітык". Я хачу паслухаць тлумачэньне такой палітыкі і выказаць сваю пазыцыю".
Кандыдат Віталь Рымашэўскі таксама ня возьме ўдзелу ў радыёдэбатах. Ён вырашыў не ахвяраваць заплянаванымі раней сустрэчамі з выбарцамі ў Горадні. Удзень ён выступіў у гарадзенскай філярмоніі, а ў 17 гадзін сустрэнецца з саюзам палякаў па адрасе вуліца Будзёнага, 48а.
"Я абраў застацца тут. Я лічу, што важней сустракацца з выбарцамі, бо па радыё было ўжо некалькі выступаў, ды і там прыйдуць дэмакратычныя кандыдаты і скажуць, што думаюць пра існую ўладу. У пунктах крытыкі ўлады мы ўсе больш-менш згодныя. А распавесьці пра сваю праграму ў гэтым фармаце наўрад ці будзе магчыма. Зноў будуць такія ж самыя вядоўцы, якія будуць спрабаваць зьдзекавацца і выстаўляць ня ў выгадным сьвятле кандыдатаў".
Кандыдат у прэзыдэнты Яраслаў Раманчук сёньня праводзіць сустрэчы ў Слуцку і Салігорску. А 17-й гадзіне ў яго заплянаваны выступ у салігорскім доме культуры. Замест Раманчука ў радыёдэбатах возьме ўдзел сябра яго штабу, старшыня АГП Анатоль Лябедзька. Спадар Раманчук сказаў:
"Радыё – гэта іншы фармат. Калі можна, каб замест мяне нехта яшчэ быў з маёй пазыцыяй, гэта значна лепш. Тым больш, што радыё мала хто слухае. Лепш сустрэцца з тысячай выбарцаў у рэгіёне, чым быць у такім эфіры. Тым больш, што можна рабіць і тое, і другое з дапамогай каманды".
Кандыдаты ў прэзыдэнты Рыгор Кастусёў, Алесь Міхалевіч і Віктар Цярэшчанка паведамілі, што зьбіраюцца браць удзел у радыёдэбатах.
Спадар Кастусёў так патлумачыў сваё рашэньне: "Я выкарыстоўваю любы момант, любую нагоду, каб зьвярнуцца да выбарцаў. Гэта няхай хвіліна, дзьве, пяць, але я яе буду выкарыстоўваць".
Пасьля радыёдэбатаў Алесь Міхалевіч, як сябар клюбу ўладальнікаў катоў, у менскім палацы моладзі возьме ўдзел у цырымоніі ўзнагароджваньня пераможцаў выставы на найлепшую котку Беларусі.
