22.12.2010 / 16:01

21-гадовай дзяўчыне, якой 19 снежня перабілі нагу, зроблена аперацыя + відэа

дадалося фота са шпіталя, відэа

Мая Абромчык упала, але яе працягвалі збіваць дубінкамі і нагамі, нягледзячы на крыкі аб паратунку.

У часе разгону дэманстрацыі 19 снежня была моцна паранена 21-гадовая Мая Абромчык. Як стала вядома «Нашай Ніве», 21 снежня ў 6-й клінічнай бальніцы Мінска ёй была зроблена аперацыя.

Здымак Алеся Пілецкага.

Фота аналагічнага эпізода ў іншым пункце плошчы Незалежнасці. Здымак Алеся Пілецкага.

У яе цяжкі пералом. Костка голені перабітыя настолькі, што нага дэфармавалася. Дактары адзначаюць, што аперацыя прайшла паспяхова. Аднак не гарантуюць, што нага адновяцца цалкам.

Са словаў Маі Абромчык, — студэнткі 4-га курса гістфака Беларускага дзяржаўнага ўніверсітэта — прыкладна а 23.30 яна з сябрамі падышлі да плошчы Незалежнасці. У гэты час там працягвалася зачыстка дэманстрантаў. Яны знаходзіліся далёка ад месца падзей, на тратуары. На Абромчык з трыма сябрамі-хлопцамі напала група амапаўцаў у форме. Пачалі біць дубінкамі і нагамі. Абромчык упала, але яе працягвалі збіваць, нягледзячы на яе крыкі аб паратунку. Збівалі і яе сяброў.

Калі збіццё спынілася, ім загадалі ісці ў аўтазак. Але Мая самастойна ісці не магла і яе на руках панёс адзін з хлапцоў.

У аўтазаку дзяўчыну правазілі тры гадзіны і толькі настойлівыя патрабаванні ўсіх затрыманых паказаць пацярпелую лекарам прымусілі амапаўцаў перавезці яе ў шпіталь.

Маю даставілі ў шостую клінічную бальніцу, што на вуліцы Уральскай. Са словаў Маі, дактары жахнуліся — костка голені была раздробленая. Дзяўчыну накіравалі на аперацыю.

Студэнтка ляжыць у 1-м траўматалагічным аддзяленні, палаце №6.

Карэспандэнты «НН» наведалі ў шпіталі 21-гадовую Маю Абромчык, якая ў часе разгону дэманстрацыі 19 снежня спецназаўцы раздрабілі нагу.

Зрабіць рэпартаж цалкам не ўдалося — дактары забаранілі праводзіць здымкі ў палаце Маі.

Чытайце таксама:

22-гадовай дзяўчыне, якой 19 снежня перабілі нагу, зроблена аперацыя

* * *

«Наша Ніва» будзе інфармаваць пра далейшае развіццё падзей. Просім паведамляць пра ўсе важныя здарэнні і факты праз nn@nn.by; тэлефоны: +375 17 284-73-29 (тэл./факс), +375 29 613-32-32 (Velcom), +375 29 707-73-29 (МТС).

Мікола Бугай, Алесь Пілецкі, Таццяна Гаўрыльчык