«Буду вучыцца, удасканальваць сваю замежную мову і разглядаць прапановы», — расказаў пра свае планы супрацоўнік АНТ Сяргей Дарафееў пасля таго, як страціў эфір. Ягоныя перадачы «Выбар» і «Выбар+" зніклі з праграмы перадач канала.«Наша Ніва» вырашыла пацікавіцца, ці можа адстаўны вядучы разлічваць на працу на адзіным беларускім недзяржаўным канале «Белсат». З такім пытаннем мы звярнуліся ў прэс-службу тэлеканала.
«Мы не гатовы прапанаваць працу Сяргею Дарафееву», — паведаміў прэс-сакратар Сяргей Пялеса.
19 студзеня Сяргей Дарафееў прызнаў, што ток-шоу «Выбар» не вернецца ў эфір. «Я выйшаў з пазапланавага адпачынку. Сёння ў мяне адбылася сустрэча з кіраўніцтвам канала, дзе быў пазначана кола маіх абавязкаў пасля эфіру 19 снежня. Кіраўніцтва той праграмай засталося незадаволена. Я працягваю заставацца дырэктарам дырэкцыі ранішняга вяшчання АНТ.
Дарафееву не даравалі шэрагу пытанняў да Лідзіі Ярмошынай у часе ток-шоу «Выбар», прысвечанага вынікам прэзідэнцкіх выбараў.
Ён спытаў у Ярмошынай, ці бачыла яна ролік, у якім у тэхнікуме куратарка адной з груп патрабуе ад вучняў з’явіцца на датэрміновае галасаванне і ці з’яўляецца такая сітуацыя парушэннем заканадаўства. «Так, гэта парушэнне», — адказала Ярмошына. «Дык значыцца, выбары прайшлі з парушэннямі?» — падлавіў яе Дарафееў. У выніку Лідзія Ярмошына дэманстратыўна пакінула студыю.
Перадача выклікала асабістае незадавальненне Аляксандра Лукашэнкі, які падчас прэс-канферэнцыі назваў Дарафеева «хлопчыкам-журналістам, якога трэба паставіць на месца».
