Пракуратура прызнала законным папярэджанне КДБ журналісту Пачобуту, нягледзячы на тое, што суд яшчэ не паставіў кропку.
Гродзенскі журналіст Андрэй Пачобут атрымаў адказ з абласной пракуратуры, куды ён даслаў скаргу на дзеянні супрацоўнікаў КДБ. 8 студзеня журналіст быў схоплены на вуліцы Гродна і дастаўлены ў КДБ. Па выніках размовы Пачобуту ўручылі афіцыйнае папярэджанне пра недапушчальнасць супрацьпраўных дзеянняў за подпісам начальніка Упраўлення КДБ па Гродзенскай вобласці Івана Каржа. Яго вінавацілі ва ўдзеле ў несанкцыянаванай акцыі 19 снежня 2010 г. у Мінску. У той дзень журналіста затрымалі на плошчы Незалежнасці, на наступны дзень яго судзілі, але справу прыпынілі для правядзення дадатковай праверкі. Такім чынам, УКДБ па Гродзенскай вобласці папярэдзіла за ўдзел у «несанкцыянаваным пратэстным мерапрыемстве» чалавека, чый удзел у гэтым самым мерапрыемстве на той момант яшчэ не быў даказаны ў судзе. Таму журналіст звярнуўся ў пракуратуру, каб абскардзіць папярэджанне. З адказу, падпісанага намеснікам пракурора Гродзенскай вобласці С. Каваленкам, вынікае, што пракуратура не знайшла парушэння заканадаўства ў вынясенні папярэджання Пачобуту і пастаноўкі яго на прафілактычны ўлік.
«Паводле закону, пракуратура павінна была ўказаць Івану Каржу на парушэнне заканадаўства, дапушчанае пры вынясенні мне папярэджання. Але адказ пракуратуры выглядае так, што яны быццам і без суда ведаюць, што я вінаваты, таму мяне можна смела папярэджваць», — кажа Андрэй Пачобут.
Ён расказаў пра візіт у пракуратуру. З матэрыяламі праверкі ён змог азнаёміцца часткова, яшчэ некалькі дакументаў супрацоўнік пракуратуры яму не паказаў, зазначыўшы, што гэта сакрэтныя звесткі. Журналіст збіраецца абскардзіць рашэнне пракуратуры.
Нагадаем, што да 10 лютага А.Пачобуту павінны адказаць з вайсковай пракуратуры, дзе знаходзіцца ягоная скарга на дзеянні супрацоўнікаў КДБ ад 8 студзеня. Па словах журналіста, у часе той гутаркі, калі яму вынеслі папярэджанне, адзін з супрацоўнікаў камітэту некалькі разоў ударыў яго па галаве. Медкспертыза выявіла ў яго невялікі сіняк на галаве.
