ЗАТ «Ашчадбанк Лізінг» набыло 50% акцый аднаго з лідараў беларускага рынку лізінгу — ЗАТ «БПС-лізінг», якое належыць ААТ «БПС-Банк», гаворыцца ў паведамленні банка.
«Уваходжанне ў склад акцыянераў „БПС-лізінгу“ аптымізуе нашы кааперацыйныя і сінергетычныя сувязі з найбуйнейшымі беларускімі прадпрыемствамі і дазволіць істотна павялічыць памер лізінгавага партфеля кампаніі», — заявіў гендырэктар ЗАТ «Ашчадбанк Лізінг» Дзмітрый Зотаў, словы якога прыведзены ў паведамленні.
«Я ўпэўнены, што дзякуючы комплексу праведзеных мерапрыемстваў і прыўнясенню інавацыйных тэхналогій у таварыства „БПС-лізінг“ мы падрыхтавалі фундамент для таго, каб кампанія ў найбліжэйшай будучыні стала адным з лідараў рынку лізінгавых паслуг Беларусі», — зазначыў, у сваю чаргу, кіраўнік «БПС-Банка» Васіль Мацюшэўскі.
ЗАТ «Ашчадбанк Лізінг» ажыццяўляе дзейнасць на рынку лізінгавых паслуг РФ з 1993 года і з’яўляецца адным з лідараў расійскага рынку лізінгу. За дзевяць месяцаў 2010 года «Ашчадбанк Лізінг» прафінансаваў дагаворы на суму больш чым 104 млрд. рублёў. Аб’ём новага бізнесу за той жа перыяд склаў 63,3 млрд. рублёў. Рэгіянальная сетка ЗАТ «Ашчадбанк Лізінг» налічвае 35 філіялаў у найбуйнейшых гарадах Расіі і даччыныя кампаніі ў Казахстане, ва Украіне і ў Беларусі.
Вопыт працы ЗАТ «БПС-лізінг» на рынку фінансавых лізінгавых паслуг складае 17 гадоў. Прыярытэтныя кірункі дзейнасці: лізінг грузавой тэхнікі, спецыяльнай тэхнікі і вытворчага абсталявання, лізінг легкавых аўтамабіляў, лізінг нерухомасці.
БелаПАН
Хочаш падзяліцца важнай інфармацыяй ананімна і канфідэнцыйна?
Пішыце рэдактару «Нашай Нівы» ў ТГ
