Нацыянальная рада аргкамітэта па стварэнні партыі «Беларуская хрысціянская дэмакратыя» на пасяджэнні 26 лютага прыняла рашэнне аб падрыхтоўцы чацвёртага ўстаноўчага з’езда партыі,
якую дагэтуль адмаўляецца рэгістраваць Міністэрства юстыцыі.
Як паведаміла прэс-служба аргкамітэта, рада прыняла рашэнне аб пачатку кампаніі «Стань сведкам». Яе мэта — «збор людзей, якія б маглі засведчыць на судовых працэсах, што ні кандыдаты ў прэзідэнты, ні іх давераныя асобы не заклікалі да гвалтоўных дзеянняў як непасрэдна на плошчы 19 снежня 2010 года, так і раней; што акцыя планавалася выключна мірнай». Удзельнікі пасяджэння заклікалі далучыцца да акцыі «ўсе дэмакратычныя сілы і штабы кандыдатаў».
Пра кампанію «Стань сведкам» заявіў 15 лютага на прэс-канферэнцыі сустаршыня аргкамітэта Віталь Рымашэўскі, які знаходзіцца пад падпіскай аб нявыездзе як абвінавачаны па крымінальнай справе аб масавых беспарадках у Мінску 19 снежня.
Перад членамі рады выступіла Таццяна Севярынец — маці сустаршыні аргкамітэта Паўла Севярынца, які больш за два месяцы знаходзіцца ў СІЗА КДБ у якасці абвінавачанага па той жа крымінальнай справе. Нацыянальная рада вырашыла «пачаць шэраг новых кампаній» у падтрымку палітыка.
Дзмітрый Уласаў, БелаПАН
Хочаш падзяліцца важнай інфармацыяй ананімна і канфідэнцыйна?
Пішыце рэдактару «Нашай Нівы» ў ТГ
