У нядзелю 3 сьнежня 2006 г. Апостальскі Адміністратар Менска-Магілёўскай архідыяцэзіі біскуп Антоні Дзям’янка зьдзейсьніў урачыстую рэкансэкрацыю касьцёлу Найсьвяцейшай Тройцы ў Радашковічах, дзе некалі быў ахрышчаны Янка Купала.
Упершыню ў гістарычных дакументах Радашковічы згадваюцца пад 1447 г., калі тут быў фундаваны касцёл пад тытулам Найсвяцейшай Тройцы. У 1740 г. у мястэчку адбылася кансэкрацыя новага драўлянага касцёла пад тытуламі Найсвяцейшай Тройцы і св. першамучаніка Стэфана. Гэта была велічная барочная святыня, над якою ўзносілася аж 6 вежаў, а інтэр’ер упрыгожвалі 7 багата аздобленых алтароў. Пры касцёле дзейнічалі школа і шпіталь, а таксама былі заснаваныя 3 брацтвы.
На жаль, тая цудоўная святыня згарэла ў пажары, і ў 1855 г. на сродкі парафіянаў пачалося будаўніцтва новага мураванага касцёла ў стылі позняга класіцызму. Праз чатыры гады будаўніцтва завяршылася, і 3 верасня 1860 г. касцёл быў кансэкраваны пад гістарычным тытулам Найсвяцейшай Тройцы. Менавіта ў гэтай святыні быў ахрышчаны народны пясняр Янка Купала.
У 1946 г. касцёл быў зачынены і прыстасаваны пад цэх завода «Беларуская кераміка». Нягледзячы на тое, што будынак быў аб’яўлены помнікам архітэктуры, ён паступова прыйшоў у аварыйны стан. У 1990 г. касцёл быў вернуты каталікам, адрэстаўраваны, а ў галоўным алтары быў змешчаны абраз Найсвяцейшай Тройцы. Пасля вяртання святыні ў ёй працавалі кс. пралат Эдмунд Даўгіловіч-Навіцкі, св. памяці кс. Зыгмунт Абартух, кс. Пётр Пятрага і, да нядаўняга часу, кс. Аляксандр Тарасевіч. Сёння пробашчам у Радашковічах з’яўляецца кс. Валянцін Станкевіч.
Радасць рэкансэкрацыі святыні дапоўнілася радасцю сакрамэнту канфірмацыі, які падчас урачыстай святой Імшы прынялі каля 100 радашковіцкіх парафіянаў. Біскуп Антоні нагадаў ім, а таксама ўсім прысутным, што яны, у сакрамэнце хросту уключаныя ў супольнасць народа Божага, праз сакрамэнт канфірмацыі пацвердзілі сваё імкненне да святасці і прынялі на сябе адказнасць клопату пра патрэбы Касцёла. У сваёй гаміліі Апостальскі Адміністратар адзначыў таксама, што Адвэнт, які распачаўся ў мінулую нядзелю, для кожнага верніка з’яўляецца святым часам, асабліва спрыяльным для навядзення мастоў і ўмацавання сувязі з Богам.
На заканчэнне літургіі, каментар да якой быў падрыхтаваны віцэ-рэктарам Міждыяцэзіяльнай вышэйшай духоўнай семінарыі ў Пінску ксяндзом доктарам Янам Крэмісам, біскуп Антоні пажадаў вернікам і іх пастыру, каб гэтая святыня ўжо ніколі больш не выкарыстоўвалася для іншых мэтаў, а заўсёды заставалася святым месцам і домам Божым. На ўрачыстасці прысутнічаў таксама кс. Аляксандр Тарасевіч, нядаўна прызначаны пробашчам у Барысаў, дзе ён распачынае будаўніцтва новага касцёла на другім беразе Бярэзіны.
Фота Алега Ціжоўкі
