Беларус Ігар Маханёк другі год запар становіцца пераможцам адкрытага Кубку Яндэксу па пошуку ў Інтэрнэце. Мянчук Маханёк атрымаў званьне «чалавека, які знайшоў усё».
На ўдзел у спаборніцтвах было зарэгістравана 13 826 чалавек з амаль 50 краінаў. У фінал, які праходзіў 7 сьнежня ў Маскве, адабраліся сямёра ўдзельнікаў. Сярод іх чатыры беларусы: бізнэс-аналітык Яўген Міроцін, праграмісты Ігар Маханёк і Аляксандар Ваяводзін, а таксама інжынер-акустык Цім Скарэнка.
У супэрфінал трапіў толькі адзін беларус – Ігар Маханёк, ён змог апярэдзіць расейца Гаўрылава і швайцарца Маранкова.
Пераможцу 22 гады, ён нарадзіўся ў Менску. Скончыў факультэт прыкладной матэматыкі і інфарматыкі БДУ. Працуе праграмістам у фірме «Авест». Летась Маханёк перамог у такім самым турніры зь першай спробы.