Паводле Валянціна Радзіна, бацькі рэдактаркі сайту «Хартыя’97» Натальлі Радзінай, яго дачка ўжо пакінула Беларусь. «Раніцай нам пазваніў невядомы чалавек і сказаў, што Натальля ўжо за мяжой.А дзе яна дакладна, не сказаў. Яе мы ня чулі», — паведаміў Валянцін карэспандэнту «Свабоды».
Таксама Валянцін Радзін паведаміў, што КДБ пачаў шукаць яе дачку яшчэ ўвечары 31 сакавіка. «Пазванілі і пыталіся, дзе яна і як ад’ехала. Мы распавялі, што жонка пасадзіла яе на цягнік „Брэст — Менск“ і што больш мы нічога ня ведаем. А яны адказалі, што правяралі той вагон, у якім яна ехала, і даведаліся, што яна выйшла ў Лунінцы і не вярнулася».
Маці журналісткі Надзея Радзіна мяркуе, што Натальля «вырашыла пазьбегнуць лёсу тых, каго ўжо пакаралі надзвычай жорсткімі тэрмінамі за падзеі 19 сьнежня».
Рэдактарку сайту «Хартыя’97» Натальлю Радзіну абвінавачваюць ва ўдзеле ў масавых беспарадках 19 сьнежня і ў іх арганізацыі. Паводле абвінавачаньня журналістцы пагражае 15 гадоў зьняволеньня. На 31 сакавіка Радзіну запрасіў на допыт у КДБ сьледчы. Напярэдадні журналістка не выключала, што ёй выставяць канчатковае абвінавачаньне. Пра свой намер зьехаць з краіны Натальля Радзіна не казала.
Атрымаць камэнтар КДБ да падзей вакол Натальлі Радзінай не ўдаецца, бо тэлефон цэнтру грамадзкіх сувязяў КДБ не адказвае.
