Еўропа гатова рэалізоўваць план эканамічнай падтрымкі Беларусі, пасля таго як у краіне распачнуцца працэсы дэмакратызацыі. Канкрэтнае напаўненне своеасаблівага «плана Маршала» для Беларусі было абмеркавана сёння ў Страсбуры на сустрэчы Аляксандра Мілінкевіча з сябрам Еўрапейскай Камісіі па знешніх сувязях і еўрапейскай палітыцы суседства Бенітай Фэрэра-Вальднэр.
Аляксандр Мілінкевіч назваў перамовы з Бенітай Фэрэра-Вальднэр надзвычай прадуктыўнымі і падкрэсліў, што спд. Фэрэра-Вальднэр «выдатна валодае беларускімі рэаліямі». Галоўнай тэмай размовы была супольная падрыхтоўка Еўрасаюзам і дэмакратычнымі сіламі Беларусі плана эканамічнай дапамогі нашай дзяржаве.
— Гэта будзе своеасаблівы «план Маршала» для Беларусі. Які ахопіць энергетычную, інвестыцыйную, сацыяльную ды іншыя сферы гаспадаркі. Еўропа канкрэтызуе сваё пасланне беларускаму народу, а мы ў сваю чаргу працуем над перспектывамі паспяховага развіцця нашай краіны, - сказаў Аляксандр Мілінкевіч.
Паводле словаў Аляксандра Мілінкевіча, Еўрапейская камісія таксама распачынае шырокую падтрымку праектаў тэле- і радыёвяшчання на Беларусь, моладзевых абменаў, праграм падтрымкі рэпрэсаваных.
