Не Ліпковіч, не Малішэўскі і не Марыйка, а рэдактар «Беларускай думкі», органа Адміністрацыі прэзідэнта.
Свой блог Вадзім Гігін вядзе не на лайвджорнале і не на блогспоце, а на сайце Беларускага тэлеграфнага агенцтва. Ягоныя тэлеграфмы пасля дружна перадрукоўваюць раённыя газеты.
Нават статуэтку яму за гэта далі 5 мая як пераможцу VІІ Нацыянальнага конкурсу друкаваных СМІ «Залатая Літара» ў намінацыі «Найлепшы аўтарскі блог».
Пра што піша Вадзім Францавіч у сваім блогу? Вось загалоўкі: «Ці патрэбная Беларусі апазіцыя?», «Опп-position», «Капітуляцыя на старце». Ужо па выбарах, пасля падзяў 19 снежня, Вадзім Францавіч паспяшаўся звінаваціць арыштаваных кандыдатаў у прэзідэнты ў «спробе дзяржаўнага перавароту», хоць, як вядома, пазней следства так і не выставіла нікому з арыштаваных падобных абвінавачванняў. Апублікаваў, так бы мовіць, недаставерную інфармацыю. Але за што іншым санкцыі, за тое Гігіну — прэмія.
Варта адзначыць, што дзейнасць Гігіна на высокім узроўні была адзначана значна раней за ўручэнне прэміі за найлепшы блог. У лютым 2011 года ён патрапіў у спіс неўязных у краіны ЕС. Адказам на гэта стаў звышэмацыйны допіс пад характэрным загалоўкам «Здравствуй, …опа, Новый год!»
Не пакінуў па-за ўвагай Вадзім Гігін і Дзень Волі, падкрэслена ўзяўшы слова «свята» ў дзвюхкоссе.
Да плюсаў блогу Гігіна трэба аднесці ягоную адкрытасць. Тут прымаюцца не толькі хвалебныя каментары, але і крытычныя. І Вадзім Францавіч не лянуецца адказваць на іх. У выніку часам завязваецца цікавая дыскусія.
