На прэмію Шнобеля: П’яны бабруйчанін пазваніў у міліцыю аб «замініраванні» і даў свой адрас

Вечарам 4 ліпеня ў Бабруйску невядомы мужчына паведаміў па тэлефоне 102 аб замініраванні Дома культуры «Шыннік». Паведамленне аказалася падманным.

Як паведаміла супрацоўніца прэс-службы УУС Магілёўскага аблвыканкама Марыя Хлыстова, званок паступіў у 21.05, калі ў Доме культуры практычна нікога не было. Званок зрабіў чалавек, будучы ў стане моцнага алкагольнага ап’янення. «Ён быў настолькі п’яны, што нават паведаміў свой адрас, чаго звычайна не адбываецца ў такіх выпадках. Хутка яго затрымалі», — заявіла Хлыстова. Яна зазначыла, што затрыманым аказаўся мясцовы жыхар 1976 года нараджэння.

Тым не менш быў праведзены неабходны комплекс мер па выяўленні выбуховага прыстасавання. Яно знойдзена не было. У дачыненні да затрыманага распачата справа на падставе ч. 1 арт. 340 Крымінальнага кодэкса (заведама падманнае паведамленне аб небяспецы).

Уладзімір Лапцэвіч, БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ